Быйыл кыһын хоту улуустарга бэрт халыҥ хаар түһэн, сайыҥҥы кэмҥэ халааннаан, хоромньуну таһаарара эрдэттэн сэрэйиллэрэ.
edersaas.ru
“Халаан уутуттан Абый улууһун авиапорда сабыллыбыта балачча кэм буолла. Айанныыр дьон эрэй бөҕөнү көрөн эрэллэр. Сөмөлүөккэ билиэттээхтэр 6 тыһ. 500 солк. төлөөн, бөртөлүөккэ билиэт атыылаһан, Муома улууһугар Хонууга көтөллөр. Ол кэнниттэн “Белая Гора-Якутск” билиэттэринэн Дьокуускайдыыллар. Билиэт сыаната 23-25 тыһ. солк. Ааҕан көрүҥ, биир киһи куоракка барарыгар аҥаардас айаныгар төһө харчыны барыырын. Бу киһи өссө икки-үс оҕолоох буоллун?! Кинилэр ороскуоттарын ааҕан-суоттаан кэбиһиҥ. Харчы кэмчилээн куруус сөмөлүөтүгэр 18 тыс. 500 солк. билиэт ылбыт дьону бөртөлүөккэ чугаһаппаттар даҕаны”, — диэн суруйар Абый улууһун Кэбэргэнэ нэһилиэгиттэн Марина Очирова. Салгыы “Авиапорду уу ылан, абыйдар эрэйгэ тэбилиннилэр” диэн ыстатыйаны ааҕа олорон, киһи ордук дьиксинэр өрүтэ тахсан иһэр. Порка киирэргэ суол, полоса устун билигин мотуорунан эрэ сылдьаллар. Уу кэлэ илигинэ порка киирээри массыына көрдөнөр эбит буоллахтарына, абыйдар билигин бөртөлүөккэ диэри тиийэллэригэр мотуорка көрдөнөллөр. Бу курдук ис хоһоонноох балаһа аҥаарын ылбыт суругу киһи салгыы кэпсии туруон курдук эрээри, ааҕааччы бу сурук салгыытын бэйэтэ ааҕара ордук. Марина Очирова бу суруйуутунан үрдүкү салалтаҕа туох көрдөһүүлээҕий? Бу туһунан хаһыат иккис балаһатыгар “Чыпчаххай” рубрикаҕа ааҕыҥ.
“Дириэктэр колонката” рубрикаҕа “Сахамедиа” холдинг генеральнай дириэктэрэ Кирилл Алексеев тэрилтэ “Саха сирэ” уонна “Якутия” хаһыаттары тарҕатыыны аадырыһа суох ситимҥэ көһөрөргө быһаарбытын иһитиннэрэр. Ол эбэтэр сыл иккис аҥаарыттан дьон хаһыаттары тарҕатыыны өрөспүүбүлүкэ улуустарыгар туруоруллар эбии стойкалартан ылыахтарын сөп. Ол эбэтэр, хаһыаттар көҥүл тарҕаныахтара. Бу туһунан сиһилии хаһыат 3-с сирэйигэр ааҕыҥ.
Саха литературатын төрүттээччи, бөлүһүөк суруйааччы, норуот тумус туттар киһитэ Алексей Кулаковскай – Өксөкүлээх Өлөксөй төрөөбүтэ 140 сылыгар аналлаах “Үс сэргэ – Үс кут” духуобунай-сакральнай эспэдииссийэ кыттыылаахтара икки нэдиэлэлээх айаннарын бу күннэргэ түмүктээтилэр. Бу туох ис хоһоонноох айаный? Бу туһунан бу нэдиэлэтээҕи хаһыаттан билсиҥ.
“2006 сылтан тэриллэр «Олоҥхо ыһыахтара» төһө да биирдиҥи халыыптаахтарын иннигэр, ханна ыытыллалларынан көрөн, уратылаах буолаллар. Кырдьаҕас Бүлүү куоракка, «Хомустаах» култуурунай-этнографическай комплекска ыһыллар ХI «Олоҥхо ыһыаҕа» ол үгэстэн туораабата – ыһыаҕы арыйыы сиэригэр-туомугар Бүлүү улууһун уратыта да арылынна, күрэхтэһиилэргэ саҥа көрүҥнэр да баар буоллулар”, — диэн суруйар Раиса Сибирякова. Суруналыыс Олоҥхо ыһыаҕар туох уратылары булан көрбүтүн ааҕыҥ.
“СӨ бырабыыталыстыбата, идэлээх сойуустар федерациялара уонна “Табаары оҥорон таһаарааччылар сойуустара” үс өрүттээх сөбүлэһиигэ илии баттаатылар”, — диэн суруйар Ангелина Васильева “Бүддьүөт үлэһиттэрин хамнастара үрдүөҕэ” диэн матырыйаалыгар. Онон бүддьүөт тэрилтэлэригэр үлэлиир дьон бу иһитиннэриин көтүппэккит чахчы.
Муус устар 26 күнүгэр буолбут Ил Дархан быһа эфиригэр киирбит ыйытыыга хаһыат нөҥүө хоруй киирбитэ. “Былырыын 2016 сыллаахха бүөрүм аккаастаан, 2-с группалаах инбэлииккэ тахсан, Дьокуускай куоракка диализнай кииҥҥэ эмтэнэ сылдьабын. 2 этээстээх эргэ мас дьиэ кыра хоһугар ыйга 10 тыhыынча солкуобайга устудьуон кыыспынаан куортамнаhан олоробут. Ыйдааҕы биэнсийэм 17 тыhыынча солк. туохха да тиийбэт. Үлэлиир кыаҕым суох, биэнсийэттэн биэнсийэҕэ диэри аһыыр-аһаабат олоробут. Эhигиттэн материальнай көмө көрдөhөбүн. Эрэнэ хааллым Марфа Ивановна”. Ыйытыыга Үлэ, социальнай сайдыы министиэристибэтэ туох эппиэти биэрдэ? Бу туһунан бу нэдиэлэтээҕи хаһыакка аах.
“Субу истэн, үөрэн олоробут. Биһиэхэ соһуччу буолла, итэҕэйбэт да курдукпут. Кыайыахпыт дии санаабатахпыт. Биэс оҕолоохпут, Стасик – саамай кырабыт, соҕотох уолбут. Стасиктаах эдьиийдэрэ — улахан кыыспыт, 7 кылааска үөрэнэр Аида бу акция туһунан билбитэ. Үчүгэй төлөпүөнэ суох буолан, бэйэтэ көҕүлээн, дьиэ кэргэниттэн түөрт киһини хаартыскаҕа түһэрэн ыыппыта. “Элбэх киһи кытыннаҕына, кыайыы чугаһыыр” диэн бириинсиби тутуспута. Онон, наһаа баҕаран, ыра санаа оҥостон кыттыбыт этэ. Мин улаханнык итэҕэйбэтэҕим эрээри, оҕобун өйөөн, дьээбэҕэ хаһы да ыытан кэбиспиппит”, – диэн “Мейзу” смартфону сүүйбүт кыайыылаах Чурапчы улууһун Сылаҥ нэһилиэгиттэн 3 саастаах Стасик Макаров ийэтэ кэпсиир. Кини кимин, аахсыйа туһунан туох санаалааҕын хаһыаттан ааҕыҥ.
“Эдэр саас” сайтка үс бастыҥ сонуннар ахсааннарыгар ааҕааччылар көрүүлэрин учуоттаан, “Сүбэһит: туох тиийбэтин үүнээйи бэйэтэ кэпсиир”, “Тымныы полюһугар — саҥа бассейн!”, “Ил Дархан ыччат ыһыаҕар ыалдьыттаата” диэн матырыйааллар киирдилэр.
“Саха сирэ” хаһыаты уонна “Эдэр саас” сайты ааҕыҥ уонна сэргээҥ.
Елена ПОТОЦКАЯ, «Саха сирэ» хаһыат, edersaas.ru