Хаһыаттар бары нэдиэлэҕэ биирдэ тахсаллара — почта үлэтигэр табыгастаах
Үөһээ Бүлүү улууһунааҕы почта отделениетын начаалынньыгын солбуйааччы Валентина Семенова бигэргэтэринэн, нэһилиэктэргэ хаһыаты-сурунаалы кэмигэр тириэрдэллэр. Холобур, Дьокуускайга сэрэдэҕэ-чэппиэргэ бэчээттэнэн тахсыбыт хаһыаттары почта массыыната Үөһээ Бүлүүгэ бээтинсэҕэ тиксэрэр.
Онон айан суолун кытыытыгар олорор нэһилиэктэр (Харбалаах, Тамалакаан, Ороһу, Нам) уонна улуус киин сэлиэнньэтин кытта Кэнтик нэһилиэгин олохтоохторо хаһыаттарын ол күн туталлар эбит. Оттон арыый тэйиччилэргэ субуотаҕа тарҕаталлар. Ол оннугар почтальоннар бэнидиэнньиккэ өрүүллэр. Быйыл саас управление олохтообут эрэсиимин быһыытынан, Кэнтик, Оҥхой, Маҥаас нэһилиэктэригэр почтальон нэдиэлэҕэ үс күн үлэлиир буолбут. Биһиги сылдьар кэммитигэр Кэнтиккэ почтальона суох хаалбыттарын эппиттэрэ. Валентина Васильевна бу күннэргэ саҥа киһи ананан үлэлээн эрэрин иһитиннэрдэ.
Туобуйа, Сургуулук, Маҥаас курдук сайын суоллара быстар уһук нэһилиэктэргэ субсидиялаах бөртөлүөт, сөмөлүөт көттөҕүнэ биирдэ почтаны туталлар. Ол уһаабыта – икки нэдиэлэ буолар. Оттон кыһыҥҥы ыйдарга, күһүн-саас өрүс хаайар кэмиттэн ураты, почта бэйэтин массыыната нэдиэлэҕэ биирдэ хайаан даҕаны баһыылканы кытта хаһыаты-сурунаалы тиксэрэр. “Хаһыаттар бары нэдиэлэҕэ биирдэ бэчээттэнэн тахсар буолбуттара – биһиэхэ, почтальоннарга, табыгастаах”, — диир Валентина Васильевна.
Василий НИКИФОРОВ, «Саха сирэ» хаһыат, edersaas.ru