Өлүөнэ өрүс мууһа устар, сырыы-айан сабыллыбыт да кэмигэр, өрөспүүбүлүкэтээҕи “Саха сирэ”, “Якутия” хаһыаттар илин эҥэр улуустарыгар болдьохторуттан хойутаабакка, тохтоло суох тиэрдиллэ турдулар.
edersaas.ru
Ол курдук, Чурапчы, Таатта, Уус Алдан, Мэҥэ Хаҥалас, Амма улуустарыгар уонна Нерюнгри, Алдан оройуоннарыгар “Якутия” хаһыат 14 800 экземпляра, “Саха сирэ” хаһыат 14 600 экземпляра тиэрдиллэр.
—Хас чэппиэр аайы, «Якутия» тахсаатын, хаһыаттары типографияттан ылаат, “Ирбиһинэн” өрүһү туоратан, Аллара Бэстээххэ тиэрдэбит. Онно экспедитор тоһуйан, таксистарга түҥэтэр. Таксистар улуус кииннэригэр тиэрдэн, агеннарга туттараллар. Агеннар улуус кииннэригэр баар стойкаларга уураллар уонна нэһилиэктэргэ ыыталлар. Онон бу систиэмэбит туох да кэһиллиитэ суох үлэлии турар, — диэн “Сахамедиа” холдинг тарҕатыыга отделын сүрүннүүр исписэлииһэ Ольга Калита иһитиннэрэр.
Онон улуус киинигэр олорор биһиги ааҕааччыларбыт хаһыаты, саамай хойутаабыта, бээтинсэ сарсыарда тутар кыахтаахтар.
Хаһыат хайдах тиэрдиллэрин бу видеоттан көрүөххэ сөп.
Ангелина Васильева, “Саха сирэ” хаһыат, edersaas.ru