close
Хаайыыга «Аһаҕас аан күнэ» ыытылынна
Бэрээдэк - Олох-дьаһах

Хаайыыга «Аһаҕас аан күнэ» ыытылынна

Өрөспүүбүлүкэ холуонньаларыгар «Аһаҕас аан күнэ» диэн тэрээһин аан бастакытын 2008 сыл күһүнүгэр ыытыллыбыта. Онтон ылата сыл аайы — күһүн уонна саас — анаан былааннанан ыытыллан, иитэр суолтата үрдүгүн уонна көдьүүстээҕин олох көрдөрдө.

edersaas.ru

Хаҥалас улууһун Мохсоҕоллоох бөһүөлэгэр баар 6 №-дээх кытаанах эрэсиимнээх холуонньаҕа бу дьыл балаҕан ыйын 7 күнүгэр ыытыллыбыт «Аһаҕас аан күнүгэр» уонтан тахса хаайыылаах чугас дьоннорун кытта көрсүһэр кыахтанна. Тэрээһини холуонньа иитэр үлэҕэ солбуйааччыта, ис сулууспа полковнига Василий Кириллин иилээн-саҕалаан ыытта.

Бастатан туран, бу күҥҥэ ыраахтан-чугастан кэлбит дьон бары бэрэбиэркэни ааһан, инструктаж истэн баран, холуонньа үлэһиттэрэ арыалдьыттаах киирэллэр. Маннык үчүгэй тэрээһиҥҥэ кыттар быраабы ылбыт хаайыылаахтар дьоннорун остолобуой таһыгар кэккэлии туран көрүстүлэр. Сорохтор оҕолорун илдьэ кэлбиттэр. Куустуһуу, симик үөрүү, ботур-итир кэпсэтэн ылыы, харах уута…

Онтон бары остолобуой дьиэтигэр киирэллэр. Онно дьоҕус сценалаах кулуупка олохтоох вокальнай-инструментальнай ансаамбыл кэнсиэрин көрөллөр, остуолларга олорон, чэй иһэ-иһэ, дьэ, кэпсэтэллэр-ипсэтэллэр, сонуннарын үллэстэллэр.

Ол кэнниттэн буруйдарын боруостааччылар бэйэлэрэ оҥорбут үлэлэрин, оҥоһуктарын быыстапкатын көрөллөр, холуонньаҕа баар таҥара дьиэтигэр сылдьаллар. Эбиэт саҕана ыалдьыттар тахсаллар. Арахсыы, куустуһуу, эмиэ харах уута…

Василий Кириллин, «замполит»:

— Бу тэрээһин икки өттүттэн туһалаах: манна олорооччу көнөр суолга турарга, болдьоҕун иннинэ босхолонон тахсарга дьулуһар, оттон төрөппүттэрэ, аймахтара киһилэрин көрөн, кэпсэтэн, санаалара уоскуйар. Маннык быраабынан үлэлиир, үөрэнэр, ис эрэсиими кэспэт, бэрээдэги тутуһар, туох да сэмэтэ суох, холуонньа олоҕор көхтөөхтүк кыттар хаайыылаах туһанар.

Марина (кэргэнэ хаайыллан олорор):

— Мин «Аһаҕас аан күнүгэр» бу иккис сылдьыым. Эрим хайдах усулуобуйаҕа олорорун, сирэйэ-хараҕа хайдаҕын көрөммүн уоскуйдум. Холуонньа дьаһалтатыгар маннык тэрээһини ыытарыгар махталбын биллэрэбин — биһиэхэ бу олус наадалаах.

Биһиги корр., «Саха сирэ» хаһыат, edersaas.ru

Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.

 

#бүгүн: 1
2
0

Сайт матырыйаалларын ааптар көҥүлэ суох ылар бобуллар.

Мин санаам:

20 − шестнадцать =