Хаайыыга — клон-ыттар

Ааптар: 
Бөлөххө киир:

Дьокуускай куорат 1 №-дээх кытаанах эрэсиимнээх холуонньатыгар бэрт дьикти-дьиибэ ыттар баар буолбуттарын туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ. 

edersaas.ru

Накаастабылы толорор уорганнар кинологическай сулууспаларыгар Джек уонна Том диэн ааттаах Малинуа бельгийскай овчаркаларын бу ый саҥатыгар аҕалбыттар. Бу ыттары 2015 сыллаахха Соҕуруу Кореяҕа научнай эксперимент түмүгэр, клоннааһын ньыматынан «оҥорон» таһаарбыттар. Дойду үрдүнэн маннык ыттар үһүөлэр эрэ   биир Новосибирскайга, иккитэ биһиэхэ.

Бу клон-ыттары Сеул лабораториятыттан оруобуна сыл анараа өттүгэр Россия байыаннай-историческай уопсастыбатын Саха сиринээҕи отделениетын бэрэссэдээтэлэ Валерий Чугунов аҕалбыт. Уонна өрөспүүбүлүкэ холуобунай-исполнительнай систиэмэтин кинологтарыгар бэлэхтээбит.

Валерий Чугунов:

  Мин бу Малинуа бельгийскай овчарка боруодатын, кини туох кыахтааҕын, хаачыстыбалардааҕын уруккуттан билэбин. Ол иһин туох да саарбахтааһына суох бу ыт оҕолорун быраабы араҥаччылыыр уорганнарга биэрэргэ быһаарыммытым. Бастатан туран, овчарка бу көрүҥэ полиция үлэтигэр анаммыт, холобура, Америкаҕа, Канадаҕа уонна да атын сайдыылаах дойдуларга курдук. Иккиһинэн, Том уонна Джек бу боруода саамай бастыҥ бэрэстэбиитэллэрин биоматырыйаалларыттан айыллан тахсыбыттара. 

Маныаха клон-ыттар Уһук Хоту дойду усулуобуйатыгар тута үөрэнэ охсубаттара, ыарырҕаталлара буолуо диэн соччо эрэммэт буолуу баара эрээри, холуонньа питомнигар үс нэдиэлэ иһигэр үчүгэй түмүктэри көрдөрбүттэр. Ону биһиги, суруналыыстар, сэтинньи 28 күнүгэр, илэ харахпытынан көрөн итэҕэйдибит.

Том диэн ыт кинолог кыргыттар тугу этэллэрин дук курдук толорон истэ: үрдүк харгыс нөҥүө ыстаныы, бэрэбинэ устун сүүрүү, саспыт киһини эндэппэккэ булуу, үрдүк кирилиэһинэн тахсыы, түһүү. Манна даҕатан эттэххэ, бу клон-ыттар күрээбит киһини булууга уонна хаайыы тулатын харабыллааһыҥҥа сулууспалыахтара.

Ирина Бабикова, 1 №-дээх холуонньа ыстаарсай кинолога:

— Бу овчаркалар үөрэҕи олус түргэнник ылыналлар, имигэс өйдөөхтөр уонна сымнаҕас майгылаахтар. Хайдах күн-дьыл турарыгар уонна туох эмит аралдьытар баар буоллаҕына, ону аахайбакка үлэлииллэр. Ол эрэн, тымныыны саҥа билбит, хаары саҥа көрбүт буоланнар, кинилэртэн билигин үгүһү ирдээбэппит. Тулуур уонна бириэмэ наада. Дрессировкалааһын анал үөрэҕин уонна сорудахтары бэркэ толороллор.

Вера Макарова, «Саха сирэ» хаһыат, edersaas.ru

Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата. 

+1
0
+1
0
+1
0
+1
0
+1
0
+1
0
+1
0