Сэтинньи саҥатыгар инстаграмҥа bult_alt диэн аккауҥҥа бэрт интэриэһинэй иһитиннэрии бэчээттэммитэ. Саха сиригэр саамай сытыы, бастыҥ булт быһаҕын күрэхтэһиитэ ыытыллыбытын уонна онно холуонньаҕа оҥоһуллубут быһах бастакы миэстэни ылбытын туһунан. Кыттааччылар ол быһахтарынан убаһа этин эттээбиттэр.
РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, кыайыылаах киһи быһаҕы киин куоракка ыытыллар дьаарбаҥкалартан атыыласпыт.
Маннык быыстапка-дьаарбаҥкаларга Накаастабылы толорор управление буруйдарын боруостааччылар оҥоһуктарынан куруук кыттар. Быһахтар, батастар, араас сувенирдар үчүгэй хаачыстыбалаах уонна тупсаҕай көстүүлээх буоланнар, дьаарбаҥкаҕа атыылаһааччылар биһирэбиллэрин куруук ылаллар.
Быһааран эттэххэ, холуонньаларга биилээх-уһуктаах тэриллэри судаарыстыбаннай стандартка сөп түбэһиннэрэн, анал лицензияҕа олоҕуран оҥороллор. Маны тэҥэ, производственнай сыахтарга профессиональнай училищеларга үөрэнэн, анал специальность ылбыт эрэ хаайыылаахтар үлэлииллэр.
Бородууксуйа хаачыстыбалаах буолуутун уонна сэрэхтээхтик туттууну холуоннньа үлэһиттэрэ хонтуруоллууллар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.