Хаайыылаахтар босхолонон таҕыстахтарына, үлэ булалларыгар тирэхтээх буоллуннар диэн, холуонньаҕа буруйдарын боруостаан олорор кэмнэригэр үөрэнэн, кэккэ идэлэри ылаллар.
Дьокуускай куораттааҕы 1, 2-с, Улахан Мархатааҕы 5-с, Үөһээ Бэстээхтээҕи 3-с, Мохсоҕоллоохтооҕу 6-с, Табаҕатааҕы 7-с нүөмэрдээх холуонньаларга итиэннэ Силиэстийэлиир изоляторга үлэлиир РФ Накаастабылы толорор федеральнай сулууспатын 317 уонна 318 нүөмэрдэрдээх училищеларыгар үөрэҕи түмүктүүр квалификационнай эксээмэннэри туттардылар.
Бу управление пресс-сулууспата иһитиннэрбитинэн, барыта 934 хаайыылаах ситиһиилээхтик туттарбыт.
Ол курдук, буруйдарын боруостааччылар тутуу маастара, электросварщик, электромонтер, столяр, слесарь, повар, иистэнньэҥ уо.д.а идэлэри ыллылар. Үөрэх болдьоҕо — 2 ыйтан биир сылга диэри.
Быйыл балаҕан ыйыгар саҥа үөрэх бөлөхтөрүн талыахтара. Үөрэниэн баҕалаахтар номнуо санааларын биллэрбиттэр.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата