Бу сайын, бэс ыйын 6 күнэ үүнэр түүнүгэр, Ленскэй куоракка баар 8 №-дээх ураты режимнээх холуонньаттан хаайыылаах балыыһа үһүс этээһиттэн ыстанан, хонбуойтан куоппута.
Бу Магомед Умаров диэн Чечня Өрөспүүбүлүкэтиттэн төрүттээх, 35 саастаах, талааһыҥҥа, массыынаны күрэтиигэ, сэби-сэбиргэли уонна боеприпастары уорууга түбэһэн итиэннэ 2012 сыллаахха Новгородскай уобаласка полицейскайы өлөрөн, 24 сылга көҥүлэ быһыллыбыт хаайыылааҕы бэс ыйын 19 күнэ үүнэр түүнүгэр туппуттара.
Силиэстийэ уорганнара хаайыылаах буруйун боруостуур сириттэн күрээбит чахчытынан РФ Холуобунай кодексатын 313-с ыст. 1 чааһынан дьыала тэрийбиттэрэ. Накаастабылы толорор уорганнар күрүөйэҕи көрдөөһүҥҥэ уонна булууга элбэх сыраларын, сириэстибэлэрин эрэ бараабыт буолбакка, үп-харчы, материальнай өттүнэн эмиэ ороскуотурбуттара. Ону барытын буруйдаах Магомед Умаровтан төлөттөрөр туһунан суукка ирдэбил түһэрбиттэрэ.
РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, Новгородскай уобалас Солецкайдааҕы оройуоннааҕы суута (2012 сыллаахха Умаровка бириигэбэр таһаарбыт суут) биһиги өрөспүүбүлүкэбит управлениетын (УФСИН) ирдэбилин өйүүргэ, ол эбэтэр, 595 тыһ. солк. суумалаах хоромньуну төлүүргэ уураах таһаарда.
Управление юридическай сулууспатын начальнига Елена Ракитина быһаарбытынан, холуонньаттан күрээбит хаайыылаах РФ Холуобунай-исполнительнай кодексатын 102-с ыстатыйатын ирдэбилинэн, кини күрээһинин түмүгэр тахсыбыт бары ороскуоту төлүөхтээх.
Манна даҕатан эттэххэ, 2035 сылга босхолонуохтаах Магомедка Умаровка ити күрээбитин иһин Ленскэй оройуоннааҕы суута өссө 2 сылы эбэн, бу холуонньаҕа уопсайа 26 сыл буруйун боруостуур буолла.
Вера МАКАРОВА, edersaas.ru