Хаандыгаҕа Дьокуускайдааҕы медицинскэй кэллиэс филиала арылынна

Ааптар: 
Бөлөххө киир:

Аҕыйах хонуктааҕыта Хаандыгаҕа (Томпо улууһа) Дьокуускайдааҕы медицинскэй кэллиэс филиала арылынна. Быйылгы сылга саҥа аһыллыбыт үөрэх кыһата сиэстэрэлэри бэлэмниир салааҕа 25 устудьуону үөрэххэ ылла. Филиал сэбиэдиссэйинэн Светлана Чикачева ананна. Ити туһунан СӨ Үөрэҕин уонна наукатын министиэристибэтин пресс-сулууспата иһитиннэрэр.

edersaas.ru


Биллэрин курдук, сорох улуустарга, уһук хоту нэһилиэктэргэ орто медицинскэй үөрэхтээх дьон тиийбэттэр. Ити ордук Мииринэй, Ленскэй, Томпо, Ньурба улуустарыгар бэлиэтэнэр диэн ыйаллар. Баар кыһалҕаны быһаарар туһугар, СӨ Бырабыыталыстыбата медицинскэй кэллиэстэргэ үөрэнэ киирээччилэргэ бүддьүөт миэстэтин 540-ҥа тиэртэ. Ону таһынан, сиэстэрэ үөрэҕэр алын медицинскэй үлэһиттэри үөрэтэргэ сорук туруораллар.

Бүгүҥҥүтэ медицинскэй каадырынан хааччыллыы мөлтөх улуустарыгар — Мириинэйгэ, Ленскэйгэ, Ньурбаҕа филиаллары арыйдылар. Балаҕан ыйын 1 күнүттэн Удачнайга (Мииринэй) уонна Хаандыгаҕа (Томпо)  аһыллан үлэлээн эрэллэр. Ону сэргэ оскуола үөрэнээччилэрин эрдэттэн бэлэмниир туһугар, филиалларга “Оскуола-кэллиэс” диэн дуальнай үөрэхтээһини киллэрэллэр. Быйылгыттан ыла Дьокуускай куорат 2 №-дээх оскуолатын кытта эмиэ үлэлэһэллэр.

Бэлиэтээн эттэххэ, медицинскэй кэллиэскэ номнуо үлэһит, ыал дьон үөрэнэ киириилэрэ үгүс. Сорохтор кэллиэһи бүтэрэн баран, салгыы үрдүк үөрэх кыһатыгар үрдэтинэн, быраас идэтин баһылыыллар. Онон, кэллиэс медицинэ эйгэтигэр тутаах каадырдары бэлэмниир үөрэх кыһатынан буолар.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0