Томпо улууһун дьокутааттара Хаандыгаҕа баар, элбэх хайысхалаах Томпо гимназиятыгар биир дойдулаахтарын, Саха өрөспүүбүлүкэтин иккис Президенэ, Уһук Илин уонна Байкал эрэгийиэнин сайдыытын боппуруостарын Сэбиэтин бэрэссэдээтэлэ, Федерация Сэбиэтин оборуонаҕа уонна куттал суох буолуутугар кэмитиэтин чилиэнэ Вячеслав Штыров аатын иҥэрэр туһунан быһаарыыны ылыннылар.
edersaas.ru
Вячеслав Анатольевич Хаандыгаҕа 1953 с. саас баччаларга күн сирин көрбүтэ. Ийэтэ Нина Ивановна Улахан Мэҥкэрэ учаастагын геолога, аҕата Анатолий Штыров муора офицера этилэр. Хаандыга бөһүөлэгэ, оччолорго НКВД базата, Ыҥаа нэһилиэгэр киирэрэ. Ол иһин, Вячеслав Анатольевич төрөөбүтүн туһунан сибидиэтэлистибэтэ Ыҥаа олохтоох сэбиэтигэр толоруллубут. Итиннэ биир дьээбэ баар эбит, дьиҥинэн ыам ыйын 25 күнүгэр төрөөбүт, ону “ыам ыйын 23 күнэ” диэн кэбиспиттэр. Аҕата Анатолий Тихонович, кэргэнин уонна саҥа төрөөбүт уолчаанын ыла Камчаткаттан кэлэ сылдьар офицер, икки хонугунан барабын диэбитигэр, сэбиэт сэкиритээрэ Иван Иванович Захаров, оччолорго сүүрбэтин ааспыт эдэр киһи, аһара долгуйан эбитэ дуу, икки күнүнэн урутатан кэбиспит. Бу туһунан Миитэрэй Наумов былырыын бэчээттэнэн тахсыбыт “Штыров уонна тыа сирэ” кинигэтигэр кэпсэнэр.
Вячеслав Анатольевич төрөөбүт дойдутугар, Хаандыгаҕа, официальнайдык аан бастаан 2001 с., АЛРОСА-ҕа президеннээн олорон, балысхан халаан кэмигэр кэлбитэ. Хампаанньа аатыттан халаантан эмсэҕэлээбит бөһүөлэктэри чөлүгэр түһэриигэ матырыйаалынан, харчынан улахан көмөнү оҥорбута. Президенинэн талыллан баран, алдьатыылаах халаан кэнниттэн оһоруннуннар, салгыы сайынныннар диэн, 2003 с. Саха сирин норуоттарын III Спартакиадаларын Хаандыгаҕа ыытарга быһаарбыта. Онон ити сыллартан саҕалаан улуус киинигэр уонна нэһилиэктэргэ тутуллубут эбийиэктэр – “АЛРОСА» спортивнай комплекс, стадион, киин балыыһа, Таҥара дьиэтэ, хайа техникума, эстетическэй киин, биэнсийэ пуонадатын дьиэтэ, оскуолалар барыта Вячеслав Анатольевич аатын кытары ыкса ситимнээхтэр. Ити иһин улуус олохтоохторун махтала муҥура суох.
Улуус кэскилин уһуйар кыһаҕа, Томпо гимназиятыгар, Штыров аатын иҥэрэр туһунан этии нэһилиэнньэттэн киирбитигэр, оройуон Сэбиэтин бэрэссэдээтэлэ, Штыров президенниир сылларыгар Томпо улууһун баһылыгынан таһаарыылаахтык үлэлээбит Илья Семенович Шадрин көҥүл ылаары быһа сибээскэ тахса сылдьыбытыгар, Вячеслав Анатольевич утарбатын биллэрбитэ. Санатан эттэххэ, бу гимназия 1998 с. тэриллибитэ, өрөспүүбүлэкэҕэ биир бастыҥ үлэлээҕинэн биллэр. Сүүрбэ сыл устата гимназияны 542 үөрэнээччи, ол иһигэр 75 оҕо кыһыл көмүс, 53 оҕо үрүҥ көмүс мэтээлинэн бүтэрбиттэрэ, 480 оҕо үрдүк үөрэх кыһаларыгар киирбиттэрэ.
Петр Новгородов, гимназия дириэктэрэ:
— Быйылгы 2018 сыл биһиэхэ бэлиэ сыл. Гимназиябыт сүүрбэ сыллаах үбүлүөйүн итиэннэ Вячеслав Анатольевич Штыров 65 сааһын туолбутун бэлиэтиибит. Бу икки дьоһун сабыытыйаны кытары даҕаспытынан гимназия саҥа дьиэтин тутуута саҕаланар буолан, өр сыллаах баҕабыт олоххо киирэр кэскиллэннэ. Аҕа дойдуга сулууспалааһыҥҥа, төрөөбүт дойдуга бэриниилээх буолууга үтүө холобуру көрдөрөр Вячеслав Штыров аатын гимназияҕа иҥэрии биһиэхэ барыбытыгар киэн туттууну үөскэтэр, улахан эппиэтинэһи сүктэрэр.
Томпо киэҥ хайысхалаах гимназиятыгар В.А.Штыров аатын иҥэрии үөрүүлээх сиэрэ-туома балаҕан ыйын 1 күнүгэр тэриллиэҕэ. Вячеслав Анатольевич онно кыттыахтаах. Бүгүн, Вячеслав Штыров төрөөбүт күнүнэн, Томпо улууһугар кэккэ дьаһаллар тэрилиннилэр — Хаандыгаҕа улуус уопсастыбаннаһын мунньаҕа буолла, оскуолаларга анал кылаас чаастара ыытылыннылар.
Раиса Сибирякова, “Саха сирэ» edersaas.ru