Бэс ыйын 18 күнүгэр Мэҥэ Хаҥалас улууһун Хаатылыматыттан ханыылаах, Тыыллыматыттан төрүттээх дьоһун-мааны дьон-сэргэ “Хаатылыма дойдум барахсан!” — өрөгөйдөөх Үрүҥ тунах ыһыахха түмсэн, күөх сайыны уруйдаата-айхаллаата. edersaas.ru
Хаатылымалар быйылгы ыһыахтара кэрэ-бэлиэ. Ол курдук, ыалдьыттарыгар үөрэ-көтө, “түөлбэлээн олорор, үөрэнэр, үлэлиир дьоһун туонабыт төрүттэммитэ 170, Уот ситимэ киирбитэ 65 уонна Ленин аатынан сопхуос тэриллибитэ лоп курдук 50 сылларыгар ананар…” , — диэн билиһиннэрэллэр.
Алгыс сиэрэ-туома, кэнсиэр, ырыа-тойук, түһүлгэнэн түмсүү, фольклор, оһуохай, саха таҥаһын куонкуруһа, араас спортивнай күрэхтэһиилэр ыһыах дьонун кыра оҕотуттан оҕонньоругар, эдэриттэн эмэнигэр тиийэ умсугуттулар.
Ким Попов, Хаатылыма баһылыга:
— Этэҥҥэ кыстыкпытын аһаран, күөххэ үктэммит үөрүүбүтүн үллэстэн, ыһыахтыы сылдьабыт. Быйыл биһиги улууспутугар сопхуостар тэриллибиттэрэ 50 сыла бэлиэтэнэр. Биһиги Хаатылымабыт отделение буолбатар даҕаны, биригээдэ быһыытынан, дьоммут-сэргэбит үлэни мэлдьи өрө туппута, билигин даҕаны ол үтүө үгэстэр салҕаналлар. Бэс ыйын 24 күнүгэр дэлэгээссийэнэн Павловскайга үбүлүөйдээх ыһыахха кыттыахпыт. Бүгүн биһиги сопхуос эрдэхтэн хорсуннук үлэлээбит чулуу дьоммутун, бэтэрээннэрбитин эҕэрдэлээтибит, махтанныбыт. Киэһэ ыччаттарга аналлаах Дьоро киэһэ ыытыллыаҕа. Түгэнинэн туһанан, дьоммун-сэргэбин бука барыгытын Үрүҥ тунах ыһыахтарынан истиҥник эҕэрдэлиибин, барыгытыгар дьолу-соргуну баҕарабын!
Татьяна Маркова, «Саха сирэ» хаһыат, edersaas.ru