Күүтүүлээх, айдааннаах Хабиб Нурмагомедов (Арассыыйа, Дагестан) уонна Конор Макгрегор (Ирландия, Крамлин) киирсиилэрэ буолуохтааҕын курдук аймалҕаннаахтык түмүктэннэ. Хабиб 4-үс рауҥҥа Коноры хабарҕалаан бэриннэрдэ. Ол кэнниттэн, уоскуйбакка октагонтан өйөн тахсан, Конор спарринг-партнера Диллон Деннискэ саба түһэн маассабай охсуһууну тарта.
«Мин кинини бэриннэрэн кыайыам»
Киирсии иннинэ Конор Хабиб дьонун, доҕотторун үөхпүтэ сүрдээх этэ. Хабибы дөйүтүөм — диэн тыллары салгыҥҥа хас хардыытын аайы быраҕаттыыра. Оттон Хабиб, бу тылларыгар Конор охсуһуу кэмигэр эппиэттиэҕэ — диэбитэ. «Кини куруутун бэринэ сылдьар киһи, мин кинини бэриннэрэн кыайыам»,- диэн ыалдьааччыларын эрэннэрбитэ.
Конор 4 раунд тулуйда
Киирсии саҕаланыаҕыттан Хабиб Коноры баһыйара көстөр этэ. Оннооҕор иккис рауҥҥа охсон дөйүтэ сыыспыта. Кэтэһиллибитин курдук, тустуутугар күүстээх Хабиб Коноры сууллара сылдьан кырбаан, төрдүс рауҥҥа тыынын хаайан бэриннэрдэ.
Дагестаннар оннооҕор Америкаҕа баппатылар
Кыайбыт-хоппут киһи быһыытынан, Хабиб саҥата-иҥэтэ сытыырхайан киирэн барбыта. Конор муннугар турар дьоҥҥо туох эрэ диэн хаһыытаабытыгар эппиэттээбиттэрин истэн баран, өйө көтөн октагон таһыгар ойон тахсан маассабай охсуһууну тарта. Онуоха, айдааннаахтарынан аатырбыт дагестанецтар түгэнинэн туһанан, ким-кимниин түбэһэринэн охсуһан киирэн барбыттар. Хабиб доҕотторо Зубайра Тухугов уонна Ислам Махачев онто да суох ыт курдук кырбаммыт Конорга түспүттэрэ. Көрөөччүлэр да хаалсыбатылар. Дьахтардыын, эр киhилиин бары охсуһа сылдьар видеолара интернет ситимигэр тарҕанна. Коноры түргэн соҕустук харабыллар саалаттан таһааран куоттардылар. Хабиб «чөмпүйүөн курум ханна баарый?» диэн ыһыытыы-хаһыытыы сырыттаҕына, UFC бэрэсидьиэнэ Дана Уайт кэлэн туох эрэ диэн быһаарда. Арааhа маннык быһыыламмытыттан сылтаан бэрдэрбэтэ быһыылаах.
Бу дьыала ыраатар чинчилээх
—Хабиб менеджерэ Ризван Магомедов уонна Конорга түспүт дьон бары хаайылыннылар, — диэн Дана Уайт аҕыйах мүнүүтэнэн, биллэрбитэ.
Хабиб инник быһыыланан, Конор саатын-суутун бэйэтинэн бүрүйэн кэбистэ. Бу дьыала өссө ханна тиийэрэ биллибэт. Сэрэйдэххэ, элбэх ыстараабынан, суутунан, баҕар UFC-ттан үүрүллүүнэн түмүктэниэн сөп.
ВИДЕО:
Николай Попов, «Саха сирэ» хаһыат, edersaas.ru