close
podpiska

«Хайп» оҥорбут Кешберини полиция дьэҥдьийэр
Олох-дьаһах - Чыпчаххай - Экэниэмикэ

«Хайп» оҥорбут Кешберини полиция дьэҥдьийэр

“Кэшберигэ” үбү-харчыны уган, ону хас да төгүл улаатыннаран чэпчэкитик эбии дохуот оҥостор платформа «МММ» курдук пирамида буолан эстэн эрэрин туһунан сонун бу күһүн киэҥник тарҕаммыта.  Сахабыт сиригэр маннык сонуну ыарыылаахтык ылыммыт киһи үгүс буолуохтаах. Бэрт элбэх киһи, оннооҕор арыый да үрдүк хамнастаах быраастар, экономистар үлэлэрин быраҕан туран, “Кэшберини» олохторун сүрүн сыала оҥостон, онно эрэ үлэлээбиттэрэ. Биир мөлүйүөнү уган баран биэһи ылабыт дииллэрэ истиэххэ сымыйа курдуга. Ол эрэн, «бастакы хараҥаччылар» ипотекаларын сабан бүтэрбиттэр, үс этээстээх дьиэ туттубуттар, сыаналаах массыына ылыммыттар. Ону истиһэн сорохтор кирэдьиит ыла-ыла киирбиттэрэ даҕаны, хампаанньа сабыллан, счеттара тоҥоруллан, укпут харчылара салгыҥҥа ыйанан хаалла.

edersaas.ru

2017 с. саҥатыгар тэриллибит инвестиционнай платформа сылга 300-600% дохуоту эрэннэрбитэ, ол эрэн, бэрт кылгас кэмҥэ күлүм гынаат, номнуо уостан хаалла. Үрдүк дохуотунан дьону угуйар сетевой маркетинг пирамида классическай сокуонунан үлэлиир — эрдэ киирбиттэр барыһыраллар, хойут киирбиттэр туга да суох хаалаллар.

200 тыһ. уган баран 600 тыһ. ыллым!  

Надежда Петровна:

—«Кэшберига» былырыын сэтинньигэ  200 тыһ. солк укпутум, онтум күн аайы 2-лии тыһ. солк. түһэ турбута. Уопсайа, 600 тахса тыһыынча түспүтэ, онон харчыны чэпчэкитик улаатыннаран ылыахха сөбүн тус бэйэм итэҕэйдим.

Билиҥҥи ырыынак үйэтигэр олох тэтимнээхтик сайда турдаҕына, араас инновационнай арыйыылары, саҥа технологиялары таба тайанан, олоҕуҥ уйгутун тупсарар кыах көһүннэҕинэ, туһанан иһиэххэ наада.

“Кэшбери”  ситимин быспакка үлэлии турбута буоллар, баҕар элбэх киһи киирэн, материальнай балаһыанньаларын тупсарыа этилэр.

 

Харчыбын төнүннэрбэтилэр

Лидия Александровна:

— Былырыын үлэбэр дьон бары «Кэшберига» киирбиттэрэ. Мин өр саарбахтаабытым, сымыйа буолуо диэн. Аны ол харчыгын криптовалютаҕа электроннай счекка уураҕын, ону устар эмиэ хааччахтардаах. Эрдэ улахан харчыны уган, ол минньигэһин билбит дьон даача, дьиэ-уот атыыластыбыт диэн кэпсииллэрин итэҕэйбэт этим. Онтон кыыһым киирэн, кырдьык кирэдьиитин саппыта, өссө саҥа массыына атыыласпыта. Миигин киир диэн хаайан быйыл саҥа киирбитим, уоппускам харчытын уонна мунньубут биэнсийэбин барытын онно укпутум. Уурдарыыбар дьэ бырыһыан ааҕыллан, харчыбын ыларым саҕана саайтарыгар тус кабинеппын хатаан кэбистилэр. Өссө 15 тыһ. страховкаҕын төлөө диэн сурук кэллэ. Сэрэйбит курдук, “Кэшбери” үп-харчы пирамидата эбит. Босхо сыыр кутуйаҕы тутар сиргэ баара биллэр.

Түргэнник харчы оҥорор ньыма күөрэс гыннаҕына, мин курдук өр толкуйдаабакка харса суох киирэн иһиэххэ наада. Ханна баҕарар эрдэ тиийбит дьон ас амтаннааҕар тиксэллэр, оттон хойутаабыт тумсун соттор.

«Кешберини» төрүттээччи хардата

Артур Варданян YouTube-ка тахсыыта:

— “Кэшбери” төһө да сабыллыбытын иһин, «GDC” диэн саҥа инвестиционнай платформаны арыйан, дьон дааннайдарын барытын онно көһөрүөхпүт. Хас биирдии туһанааччы тус кабинетыгар саҥа сирэй аһыллыа. Онно төһө харчыгыт хаалбыта, хампаанньа төһөнү төнүннэриэхтээҕэ ыйылла сылдьар. Ол харчыны кыраапык оҥорон, криптовалютанан төлүөхпүт. Ый бастакы күнүн аайы үбү төттөрү таһаарар кыах бэриллиэ.

Кыраапыгы бырыһыан быһыытынан оҥоруохпут. Холобур, 100 тыһ. солк. укпут киһи ахсынньы 1 күнүгэр 5% ылыахтаах, оччотугар кини ити күн 5 эрэ тыһ. солк. устуон сөп.

Саҥа платформа үлэҕэ киириэр диэри дьон бириэмэ биэрэн, кыратык күүтэ түһэллэригэр көрдөһүөм этэ.

 

Альберт Игнатьев, “Кэшбери” хампаанньа Саха сиринээҕи региональнай лидерэ: 

— «Кешберигэ» баар дьону “GDS” диэн саҥа платформаҕа киллэрэн, билигин аан дойду таһымыгар 14 судаарыстыбаны холбооннор, улахан холдинг тэрийэн эрэллэр. Онон ким да харчытын сүтэрбэт, олох долгуйумаҥ. Ол туһуттан билигин хас биирдии киһи верификация ааһыахтаах. Верификация диэн бу эн арыйбыт аккауҥҥар тыыннаах киһи олорорун дакаастыахтааххын. Онон саҥа хампаанньаҕа киирэрбитигэр кабинеппыт көмүскэллээх, ким эрэ аатыгар суруллубут буолуон наада.

 

Валентина Алексеева, уйулҕа үлэһитэ:

— Хас биирдии киһи ис туругар оҕо, улахан киһи уонна төрөппүт оруола баар. Олохторугар оҕо оруолун үгүстүк туттар дьон итэҕэйимтиэ, сонумсах буолалларын таһынан, кинилэр быһаарыныылара кэлин тугунан эргийэн тахсыан ситэри өйдөөбөттөр. Ол иһин араас угаайыга, албыҥҥа киирэн биэриэхтэрин сөп. Киһи ис туругун тэҥнээн биэрэргэ идэтийбит уйулҕа үлэһиттэрэ үлэлэһэллэр.  

Түмүк

Киин баан ааҕыытынан, “Кэшбери” үп-харчы пирамидата 3 млрд солк. хомуйан, дьону албыннаата. Ол харчы хаһаайыттарыгар төннөрө билиҥҥитэ саарбах соҕус. GDC диэн саҥа клон саайтара 2019 с. олунньутуттан үлэлиэхтээх. Оттон бырайыагы төрүттээччи Артур Варданян кыраныысса таһыгар куоппут, онно тиийэн Braxso диэн эмиэ инвестициянан, криптовалютанан дьарыктанар саҥа платформаны арыйбыт диэн «Рамблер» сонуннарыгар суруйаллар. Билиҥҥитэ полиция уорганнара Варданян хампаанньатын бэрэбиэркэлии сылдьаллар. Ол түмүгүнэн, РФ Холуобунай кодексатын 159 ыст. олоҕуран, холуобунай дьыала көбүтүллүөн сөп.

Ол аайы кини санаатын түһэрбэт, хата аан дойду ырыынагар тахсарга “Кэшбери” бастакы кыра далаһа, GDC хас да омук сиригэр тэҥҥэ үлэтин саҕалаатаҕына, маҥнайгы сылыгар кырата 5 мөлүйүөн киһини киллэрэр дьоһун былааннаах.

Урут эмиэ Хопер-инвест, МММ диэн инвестиционнай хампаанньалар мөлүйүөнүнэн дьону албыннаан, тэрийээччилэригэр холуобунай дьыала көбүтүллэн, эппиэккэ тардыллыбыттара.

Марианна Тыртыкова, «Саха сирэ», edersaas.ru

 

#бүгүн: 4
3
3

Сайт матырыйаалларын ааптар көҥүлэ суох ылар бобуллар.

Мин санаам:

одиннадцать + два =