Халаан уутугар эмсэҕэлээбиттэргэ Россия хаһаас фондатыттан 587,3 мөл. солк. Саха сиригэр көрөр туһунан уураахха бэҕэһээ РФ бырабыыталыстыбатын бэрэссэдээтэлэ Дмитрий Медведев илии баттаата.
Санатан эттэххэ, саас 15 оройуон уонна Дьокуускай куорат халаан уутугар ылларан, өрөспүүбүлүкэбитигэр федеральнай суолталаах ыксаллаах быһыы-майгы биллэриллибитэ. Ил Дархан э.т. Айсен Николаев дуоһунаһыгар киирээт да, халаан содулун туоратыыга ыйаах таһаарбыта. Бэс ыйыгар РФ үбүн миниистирин Антон Силуановы уонна РФ ыксаллаах быһыыга-майгыга миниистирин Евгений Зиничевы кытары көрсүһүүлэригэр халааҥҥа эмсэҕэлээбит уонна уу содулун туоратыыга РФ бырабыыталыстыбатын анал уурааҕын туһунан кэпсэтэн турар. Бу боппуруос от ыйыгар РФ бэрэсидьиэнэ Владимир Путин халаан уонна баһаар содулун туоратыыга ыыппыт мунньаҕар көрүллүбүтэ. Онно Владимир Владимирович Саха сиригэр суһаллык көмө харчыны ыытарга сорудахтаабыта. “Кэтэспит уураахпыт дьэ таҕыста. Билигин аны, харчы түстэр эрэ, дьоммутугар, хас биирдиилэригэр, көмөнү ыыта охсуохпутун наада”, — диэн суруйар Ил Дархан э.т. Айсен Николаев бэйэтин “Инстаграмыгар”.
Докумуоҥҥа сурулларынан, биирдиилээн дьоҥҥо көмөҕө бу харчыттан – 39,7, дьиэлэрин сорҕотун ууга ылларбыт дьиэ кэргэҥҥэ – 65,4 уонна баайдарын-дуолларын бүүс-бүтүннүү сүтэрбит ыалларга – 131,7 мөл. солк. барыаҕа. Ону таһынан 128,1 мөл. солк. – саахалы туоратыыга, 222,2 мөл. солк. – эбийиэктэри чөлүгэр түһэриигэ ороскуоттаныаҕа.
Аграфена КУЗЬМИНА, “Саха сирэ” хаһыат, edersaas.ru