Бырабыыталыстыба бэрэссэдээтэлин бастакы солбуйааччы Алексей Колодезников балаҕан ыйын 26 күнүгэр Орто Халыма улууһун Арҕахтааҕар сылдьан халаан содулун туоратар үлэни-хамнаһы билистэ.
Арҕахтаахха тэрилтэлэр бары үлэлии-хамсыы тураллар. Кэлэр сылга «Мин Сахам сирэ 21-с үйэҕэ» Үтүө дьыала хамсааһын чэрчитинэн, саҥа оҕо саадын дьиэтэ, 2019 сылга саҥа оскуола үлэҕэ киллэриллиэхтэрэ. Алексей Колодезников халааҥҥа ылларбыт дьиэлэргэ сылдьан, ыаллар кыстыгы көрсө хайдах оҥостон эрэллэрин көрдө-иһиттэ (42 дьиэ ууга барбыта). Бөһүөлэккэ уу билигин да турар, дьиэлэр аннылара инчэҕэй, куурдуллар кыахтара суох. Муостаны сылытарга туһаныллар фенопол бөртөлүөтүнэн аҕалыллыбыт, оттон атыылаһыллыбыт 20 мөл. солк. суумалаах тутуу матырыйаала кыһыҥҥы суолунан эрэ тиэрдиллиэхтээх. Инньэ гынан, хапытаалынай өрөмүөн, чөлүгэр түһэрэр үлэлэр, сүрүннээн, эһиил ыытыллыыһылар. Халаантан эмсэҕэлээбит ыалларга 1 мөл. 920 тыһ. солк. суумалаах биир кэмнээх көмө оҥоһуллубут. Ону таһынан, бу нэдиэлэҕэ Ил Дархан сорудаҕынан, чөлүгэр түһэрэр үлэни тэрийиигэ ыал ахсын 50-нуу тыһ. солк. бэриллиэхтээх.
Нэһилиэнньэни кытары көрсүһүүгэ олохтоохтор өрөспүүбүлүкэ салалтата халаан содулун туоратыыга көмөтүн иһин махтаннылар.
Алексей Колодезников, бырабыыталыстыба бэрэссэдээтэлин бастакы солбуйааччы:
— Балаһыанньаҕытын өйдүүр буоламмыт, биһиги Арҕахтааҕы ураты хонтуруолга тутабыт. Бу сырыы түмүгүнэн эбии туох дьаһаллары ыларбытын сүбэлэһиэхпит. Тутуу матырыйаалларын миэстэҕэ тиэрдэргэ туспа быһаарыы итиэннэ чөлүгэр түһэрэр үлэлэри тэрийэргэ, биригээдэлэри үлэлэтэргэ 30 мөл. солк. эбии көрөр наада буолуоҕа. Барыгытын Саха Өрөспүүбүлүкэтин күнүнэн эҕэрдэлиибин, үлэҕитигэр уонна олоххутугар ситиһиилэри баҕарабын!
Раиса СИБИРЯКОВА, “Саха сирэ” хаһыат, edersaas.ru
