close
Халаан: Норуот күүһэ — көмүөл күүһэ
Олох-дьаһах - Тыа сирэ

Халаан: Норуот күүһэ — көмүөл күүһэ

Алдан Эбэ халааннаан, биһигини улаханнык аймаата. Ол курдук, Күп, Элдьикээн бөһүөлэктэрэ ууга бардылар. Дьон-сэргэ түмсүүлээх эрэ буолан өрүһүннүлэр.

edersaas.ru


Сир, халлаан силбэспитин курдук, тула уу ортотугар хаалар, хайа курдук муустар тоҕута солоон даамбаны хайа сүүрэн, сир-дойду муора курдук килэс гына түһэрэ ынырык көстүү. Эдьээҥҥэ ыам ыйын 13 күнүгэр көһөҥө муустаах уу кэлэн, даамбаны, кытыл бэстэрин тоҕута солоон, бөһүөлэккэ килэс гына түспүтэ. Кэтэх маарынан уу киирэн, бөһүөлэк кытыы өттүн, уонтан тахса ыал дьиэтин ылла. Дьон бэйэлэрэ эрэ нэһиилэ куотан биэрээхтээтилэр, туохтара барыта ууга хаалла. Билигин суһал хамыыһыйа тэриллэн, төһө хоромньу тахсыбытын ааҕа, докумуон оҥоро сылдьар. Уоппут, ититиибит барыта баар. Дьон-сэргэ кыайалларынан малларын-салларын, сүөһүлэринастарын куоттара сатаатылар, төрүт бэлэмэ суох олорботулар, ол да буоллар биирдиилээн ууга былдьаммыт сылгылар бааллар. Кыра оҕолору, оҕолоноорy сылдьар дьахталлары, инбэлиитэри, кырдьаҕастары бөртөлүөтүнэн Уус Маайаҕа илдьибиттэрин бүгүн аҕаллылар. Ыраас уунан, эминэн-томунан эмиэ хааччыйдылар, онон үөрэн, сэргэхсийэн олоробут. Биһиги туспутугар кыһаллар салайааччыларбытыгар, Ыксаллаах быһыы-майгы министиэристибэтигэр нэһилиэк аатыттан махталбытын тиэрдэбит, «норуот күүһэ-көмүөл күүһэ» диэн мээнэҕэ этиллибэтэҕин өссө төгүл итэҕэйдибит.

Билигин да уоскуйар эрдэ, кытылга дьиэ үрдүгүн саҕа муустар олорон хааллылар, аны хара уу кэлэн ааһыа турдаҕа. Бу үлүгэрдээх халаан кэлэр өттүгэр хатыламматын туһугар наука өттүнэн чинчийии, үөрэтии наада буолууһу. Айылҕа күүһүгэр бэриннэхпитинэ, Үрдүк Айыыларбыт да, үҥэр таҥарабыт да абырыа суоҕа.

Ууга барбыт доҕотторбутугар төһө күүспүт кыайарынан көмөлөһүөҕүҥ! Сотору кэминэн ыһыы, оҕуруот үлэтэ саҕаланыа. Онтон саамай кэтэһиилээх бырааһынньыкпыт, ыһыахпыт кэлиэҕэ, сахалыы сайбаччы таҥнаммыт самаан сайыммытын көрсүөхпүт, үөрүөхпүт-көтүөхпүт турдаҕа!

Эдьээнтэн Ирина ВИНОКУРОВА, Саха сирэ» edersaas.ru сайтка анаан

#бүгүн: 1
1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

4 × пять =