Халаан содулун туоратыыга уонна эмсэҕэлээбиттэргэ көмөҕө көрүллүбүт харчы барыта кэлиэҕэ
Арассыыйа Федерациятын гражданской оборона дьыалатыгар, ыксаллаах быһыыга-майгыга уонна айылҕа быһылаанын содулун туоратыыга (ЫБММ) миниистирэ Евгений Зиничев Ил Дархан э.т. Айсен Николаевтыын сааскы халааҥҥа ылларбыт улуустарга чөлүгэр түһэрэр үлэ хайдах баран иһэрин, эмсэҕэлээбиттэргэ көмөнү оҥоруу туругун итиэннэ ойуур баһаарын умулларыы уонна сэрэтии дьаһалларын тустарынан дьүүллэстилэр.
edersaas.ru.
От ыйыгар ЫБММ Саха Өрөспүүбүлүкэтэ түһэрбит докумуоннарыгар олоҕуран, Арассыыйа Бырабыыталыстыбатыгар үбүлээһини көрөр туһунан дьаһалы киллэрбитэ. Онно олоҕуран, айылҕа быһылаанын сэрэтии, туоратыы уонна чөлүгэр түһэрии саппаас пуондатыттан өрөспүүбүлүкэҕэ 587 мөл. 304 тыһ. солк. көрүллэн, толору кээмэйинэн бэрилиннэ. Мантан биир кэмнээх материальнай көмөҕө 39 мөл 780 тыһ. солк., туттар малларын-салларын сороҕун сүтэрбиттэргэ 65 мөл 450 тыһ солк., дьиэлэрин-уоттарын олорчу былдьаппыттарга 131 мөл 700 тыһ солк. бэриллиэҕэ.
Евгений Зиничев эмсэҕэлээбиттэргэ анаммыт көмөнү төһө кыалларынан суһал соҕустук тиэрдэргэ итиэннэ суол-тырааныспар инфраструктуратын чөлүгэр түһэриини тэтимнээхтик тэрийэргэ Ил Дархан эбээһинэһин толорооччуттан көрдөстө. Ойуур баһаарыгар ураты болҕомтону уурарга, уот туруутун сэрэтэр, уот көрдүгэнниирин бохсор үлэни быспакка ыытарга, нэһилиэнньэҕэ иһитиннэрэр-биллэрэр үлэни күүһүрдэргэ, саҥа технологияны туһанарга, мониторины күннэтэ ыытарга эттэ. Бу үлэҕэ муниципальнай тэрээһиннэр баһылыктарын, тэрилтэлэр салайааччыларын, сири бас билээччилэри уонна түүлэһээччилэри тардыҥ диэтэ. ЫБММ Саха Өрөспүүбүлэкэтинээҕи Сүрүн управлениетыгар Национальнай киини кытары суһал дьаһаллары ылынарга баар быһыыны-майгыны үөрэтэн, сиһилии ырытан, ол түмүгүн толоруулаах былаас итиэннэ олохтоох салайыыны уорганнарыгар тиэрдэргэ сорудахтаата. Маны таһынан, тулалыыр эйгэ, күн-дьыл уонна айылҕа туруктарын кэтээн көрөр биэдэмистибэлэри тардарга эттэ диэн ЫБММ пресс-киинэ иһитиннэрэр.
Раиса Сибирякова, «Саха сирэ» edersaas.ru