close
Халлааҥҥа оһуохайдаан турардаахтар
Олох-дьаһах - Төлкө - Хараҥа хос

Халлааҥҥа оһуохайдаан турардаахтар

Ити балачча ыраатта. Төрдүс-бэһис кылааһы бүтэрбит сайыным быһыылааҕа.

Дэриэбинэ оҕолоро сайын оттоон-мастаан, дьоммутугар көмөлөһөн күн солото суох буоларбыт. Онон ким дэриэбинэҕэ баар мустан оонньуур кэммит диэн, киэһэ хойутуу буолааччы. Ону да ынах үүрэн аҕалан, түптэ түптэлээн баран биирдэ. Өссө дьонуҥ көҥүллээтэхтэринэ.

Биирдэ оннук уочараттаах мустуубутугар пааркаҕа көрүстүбүт. Оҕурсулаахпыт, туустаахпыт. Аһаабатах дьон курдук оннук аҕалан сиир идэлээх этибит. Өссө, сорох-сорох табаарыстар хантан-хантан аҕалалларын хантан билиэҥий. Оннук мустан оонньуубут даҕаны, арааһы кэпсэтэбит даҕаны. Дьэ, ол киэһэ оннук араас кутталлааҕы  кэпсэтэ олорон, халлааммыт хараҥарбытын да аахайбакка хааллыбыт. Дьиҥэр, үксүгэр да оннук буолааччы эрээри, ол күн төбөбөр ордук хатаммыт.

Арай, биир уолбут этэр: «Доо, истиҥ доо, ханна эрэ дьон ыллыыр дуу?». Биһиги бары чөрөһө түстүбүт. «Суох, төрүт да ыллаабаттар» диэн буолла. Салгыы кэпсэтиэх курдук гынан истэхпитинэ, уолбут эмиэ ыллыыллар да ыллыыллар диэн турда. Өссө «Оһуохайдыыллар эбит буолбат дуо» диэтэ. Биһиги ону аахайбакка, кэпсэтэ-кэпсэтэ  банаарбытынан тыктарса олордубут. Онтон эмискэ уолбут чахчы куттаммыта билиннэ, сирэйэ уларыйан, хараҕа быччайан хаалбыт. Ону да банаардаах буоламмыт көрдөхпүт. «Истиҥ доо, истиҥ. Үөһээ дии», — дии-дии халлаан диэки ыйда. Онно өйдөөн истибиппит, дьон эмиэ да ньамалаһар, эмиэ да оһуохайдыыр саҥата адьас субу үрдүбүтүнэн туһаайан чугаһаан эрэр эбит. Биһиги ону иһиттибит-истибэтибит,  уоллуун-кыыстыын хаһыытыы-хаһыытыы дьиэлэрбит диэки сүүрэн бытарыстыбыт. Ким эрэ охтон түстэ, ким эрэ ытыыр, ким эрэ сарылыыр. Аймалҕан бөҕө буоллубут.

Ол күн куттанан аҕай дьиэбэр тиийбитим. Дьоммор сарсыныгар кэпсээбиппин, «кимиэхэ да кэпсээмэ» диэн кытаанахтык бобон кэбиспиттэрэ. Өтөр буолбатаҕа быһыылааҕа, нэһилиэк биир саамай тумус туттар эдэр киһитэ соһуччу «барбыт» сураҕа иһиллибитэ.

Маппый.

Хаартыска: интэриниэттэн

 

#бүгүн: 1
0
2

Сайт матырыйаалларын ааптар көҥүлэ суох ылар бобуллар.

Мин санаам:

4 × один =