Ааспыт нэдиэлэҕэ «Бүлүү» федеральнай суолга дьон өлүүлээх СТБ (суол-транспортнай быһылаан) буолбутун кэнниттэн алтынньы 2 күнүгэр «Халыма» федеральнай суолга эмиэ улахан СТБ таҕыста.
Ити күн 22 чаас 20 мүн. 1995 сыллаах төрүөх суоппар «Ниссан Караван» массыынатынан Өймөкөөн улууһун Томторуттан айаннаан иһэн, суолтан туораан тахсан, иэдээни таһаарда. Ити түмүгэр 8 саастаах кыыс суорума суолланна, 6 улахан киһи уонна икки оҕо араас эт-хаан эчэйиитин ылан, балыыһаҕа киирдилэр.
Суоппар батсаап көмөтүнэн Томтор – Дьокуускай маршрутунан дьону илдьэбин диэн иһитиннэрии биэрбит уонна алтынньы 1 күнүгэр киэһэ 11 чаас саҕана алта улахан киһини кытта үс оҕону тиэнэн ыраах айаҥҥа туруммут. Үс чаас курдугунан «Күбэмэ» саппараапкалыыр станцияҕа тиийбит уонна эбии сэттэ киһини ылбыт. Таатта улууһун Чөркөөҕөр тиийбэккэ эрэ, массыынатын кыайан салайбакка иэдээни таһаарбыт.
22 саастаах эдэр суоппар урбаанньыт эбит эрээри, дьону тиэйэргэ аналлаах көҥүлэ суох. Итини тэҥэ, ирдэбили кэспит. Салонун иһигэр хас даҕаны олорор сири эбии туруорбут уонна анал кур суох эбит. Аны туран, көлүөһэлэрин шиналарын протектора араас-араас буолан биэрбит.
Суорума суолламмыт кыысчаан эбээтин кытта инники олорбут. Массыына ууга түһэр кэмигэр улахан дьон быыһаммыттар. Ыксаллаах кэмҥэ кыра оҕолоохторун умнан кэбистэхтэрэ.
Суоппар массыына ыытар быраабы 2016 сыл атырдьах ыйыгар ылбыт. Саахал кэмигэр арыгы испэтэх эбит.
ГАИ иниспиэктэрдэрэ анал көҥүлэ суох суоппардарга дьон олорсуо суохтаах диэн куруук этэллэр. Анал бэрэбиэркэ кэмигэр, төттөрүтүн оҥорон, «Билэр киһибитинэн үбүлүөйгэ баран иһэбит», – диэн сымыйалаан кубарыталлар. Итинник албынныыртан элбэх суоппар харытыттан туттарбакка хаалан, тустаах эппиэтинэскэ тардыллыбат. Кэлин тиһэҕэр итинник иэдээн тахсар. Онон такси өҥөтүнэн туһаныах иннинэ суоппардартан анал көҥүллээҕин, көҥүлэ суоҕун ыйытар толору бырааптаахпыт уонна тустаах уорганнарга үҥсүөххэ даҕаны сөп. Пассажирдар итини толороргут эбитэ буоллар, таксистар син өрө тардыныах этилэр. Этэҥҥэ айаннааҥ!
Александр ТАРАСОВ, «Саха сирэ» хаһыат, edersaas.ru