«Олохтон хаалсыбат туһугар сорсуйар санааны умнан, сэргэхтик тутта сылдьыахха, саҥаны, элбэҕи билиэххэ», – диэн олоххо угуйар үтүө тылларынан хамаҕатталар нэһилиэктэрин дьонун үтүө тэрээһиҥҥэ ыҥырдылар.
edersaas.ru
Хамаҕаттаҕа былырыын тэриллибит «Дьэрэкээнэ» түмсүү сэргэх тэрээһини ыытта. Бу күн нэһилиэк кырдьаҕастара сиэл оҥоһуктары оҥорууга билиилэрин чиҥэттилэр, үгүстэр саҥа боруобалыылларыттан кыбыстыбакка, үөрэ-көтө үөрэннилэр. Түмсүү салайааччыта Мария Аманатова кылтан аҕыс утаҕынан тымырдаайы оҥоруутун билиһиннэрдэ. Кыла суох кэлбит дьон кыл оннугар баайыы сабы туһанна. Ону сэргэ, сахалыы иискэ, кыбытыылаах тигиигэ сүбэлэри-амалары ыллылар. Вера Ильинична Борисова сиэлинэн сибэкки оҥорорго үөрэттэ. Эдэр кийиит Ульяна Тимофеева түмсүүгэ кыттыһан, кылга саҥа үөрэнэн эрэриттэн үөрэн махтанна. Бу күн «дьэрэкээнэлэр» бэйэлэрин оҥоһуктарынан быыстапка тэрийдилэр.
Түмсүү үлэтин инникитин өссө кэҥэтиэн баҕарар. Онон, тэрээһиҥҥэ кэлбит кэрэ аҥаардар бу күн сирэйи эдэригэр түһэрэр мааскалары бэйэлэригэр оҥорторон боруобалаатылар, көмүс симэхтэри хайдах ыраастыыры, сууйары көрдүлэр.
Маннык үтүө тэрээһин «Кэскил» балаҕан дьиэтигэр буор-босхо ыытылынна. Сэргээн, сэҥээрэн кэлбит кырдьаҕастар салайааччы Мария Николаевнаҕа махтаннылар уонна өрүү маннык туһалаах көрсүһүүлэргэ ыҥыра турарыгар баҕардылар. Зыряновтар дьиэ кэргэн махталларын биллэрэн, Мария Аманатоваҕа бэйэлэрэ оҥорбут сахалыы халандаардарын бэлэхтээн үөртүлэр.
Мария Аманатова бэйэтин түмсүүтүн туһунан маннык сэһэргээтэ:
«Уран тарбахтаах «дьэрэкээнэлэр» сааһыттан тутулуга суох дьону түмэн, бэйэбит баҕа санаабытынан баҕалаахтары үөрэтиэхпит.
«Түһүлгэ» сынньанар кииҥҥэ хомус уонна фольклор бөлөҕөр аан бастакы оҥоһукпутун – 7 устуука түөскэ кэтэр харысхалы бэлэхтээбиппит. Аны Олоҥхо ыһыаҕар салама оҥорорго бэлэмнэнэбит».
Надежда ЕГОРОВА, «Саха сирэ» хаһыат, edersaas.ru