Тохсунньу 1 күнүттэн «Хамсаабат баайы-дуолу судаарыстыбаннай регистрациялааһын туһунан» (№ 218-ФЗ) федеральнай сокуон олоххо киирдэ. Онон хамсаабат баай-дуол кадастрын учуота уонна бас билии быраабын судаарыстыбаннай регистрациялааһын холбоһон, Хамсаабат баай-дуол биир кэлим судаарыстыбаннай реестрэ баар буолла (Единый государственный реестр недвижимости-ЕГРН). Анивера Акимова, «Саха сирэ» хаһыат, https://edersaas.ru
Биир кэлим испииһэккэ хамсаабат баай-дуол эбийиэктэрэ (хамсаабат баай-дуол кадастра), бас билии бырааба, кыраныыссалар реестрдэрэ киллэриллиэхтэрэ. Бүгүҥҥү туругунан кыраныыссалар туһунан дааннайдар кадастр докумуонугар киллэриллэ сылдьаллар.
Саҥа сокуоҥҥа олоҕуран, кадастр учуотун оҥоруунан уонна быраабы регистрациялааһынынан Росреестр уонна территориялардааҕы уорганнар дьарыктанар боломуочуйаланнылар. Сокуон олоххо киириэр диэри, кадастр учуотун Кадастровай палата оҥорор этэ.
Иккиһинэн, докумуону оҥорторуу болдьоҕо кыччаата. Холобур, кадастр учуота – 5 үлэ күнүнэн, судаарыстыбаннай регистрациялааһын – 7 күнүнэн бэлэм буолуоҕа. Кадастры уонна судаарыстыбаннай регистрациялааһыны тэҥинэн оҥорторор түгэҥҥитигэр, бэлэм докумуону 10 күнүнэн илиигитигэр ылыаххыт. Оттон элбэх функциялаах киин өҥөтүнэн туһанар буоллаххытына, докумуону оҥорторуу 2 күнүнэн уһаан биэрэр.
Үсүһүнэн, өскөтүн атыыласпыт дьиэҥ атын улууска, биитэр куоракка баар буоллаҕына, Росреестр салааларыгар уонна элбэх функциялаах киин нөҥүө оҥорторуоххун сөп.
Төрдүһүнэн, кадастровай учуокка быстах кэмнээх сир учаастактара суох буолуохтара. 2017 сыл тохсунньу 1 күнүгэр диэри оҥоһуллубут быстах кэмнээх учаастактар 2022 сылга Хамсаабат баай-дуол биир кэлим судаарыстыбаннай реестриттэн уһуллуохтара.
Анивера АКИМОВА, «Саха сирэ» хаһыат, https://edersaas.ru