Хапсаҕай муҥутуур кыайыылааҕар Увар Тимофеевка сэттэ биэни бэлэхтээтилэр
Үөһээ Бүлүүгэ ыытыллыбыт сүүрбэһис үбүлүөйдээх «Манчаары Оонньууларын» хапсаҕайга муҥутуур кыайыылааҕынан Увар Тимофеев буолла.
Бу олохтоохтор көҕүлээһиннэринэн аан бастаан ыытыллыбыт түһүлгэҕэ Амма, Мэҥэ Хаҥалас, Нам, Өймөкөөн, Сунтаар, Таатта, Уус Алдан, Бүлүү, Дьааҥы, Горнай, Эбээн-Бытантай, Эдьигээн, Үөһээ Бүлүү, Мирнэй улууһун Садын родовой общинатын бэрэссэдээтэлэ Альберт Данилов, Ньурба улууһун дьокутааттарын сэбиэтин бэрэссэдээтэлэ Сергей Евсеев, Булуҥ улууһун бэрэстэбиитэлэ Альбина Федорова, Дьокуускай куорат баһылыгын солбуйааччы Георгий Михайлов, номоххо киирбит буойун, хапсаҕайдьыт Буучугурас төрөөбүт Мэйик нэһилиэгин баһылыга Михаил Хаччагаев, Орто Халыма улууһун дьокутааттарын сэбиэтин бэрэссэдээтэлэ Пантелеймон Сыроватскай бириискэ биирдии биэни туруоран, улуустарын бастыҥ бөҕөстөрүн аҕалан туһуннардылар. Күрэс балаһыанньатынан, хотторбут хапсаҕайдьыттаах баһылык биэтин кыайыылаах баһылыкка туттаран иһэр.
Бу күн «Үс Хоһуун» стадиоҥҥа кэлбит дьон ааттаах-суоллаах хапсаҕайдьыттар Михаил Тихонов, Семен Семенов, Николай Николаев, Баир Укоев, Евгений Алексеев, Юрий Старостин уо. д. а. кыттыылаах бэрт интэриэһинэй хапсыһыылары дуоһуйа көрдүлэр.
Кыайыылааҕы быһаарар түмүк хапсыһыыга Увар Тимофеев (Үөһээ Бүлүү) уонна Николай Николаев (Бүлүү) күөн көрүстүлэр. Хапсыһыы иннинэ улуустарын баһылыктара Владимир Семенович уонна Сергей Николаевич кыайыылаахха иккилии биэни туруоралларын иһитиннэрдилэр. Манна очукуонан Увар Тимофеев кыайыылааҕынан таҕыста. Киниэхэ улууһун баһылыга Владимир Семенович хотторуулаах улуустартан хомуйуллубут сэттэ биэҕэ сертификаттары көрөөччүлэр уруйдарын-айхалларын ортотугар туттарда.
Роман Попов, «Саха сирэ» хаһыат.
Ааптар хаартыскаҕа түһэриилэрэ.