Бэрт аҕыйах хонугунан, алтынньы 5 күнүгэр, “Хара бэкир” диэн ураты тыыннаах саҥа киинэ тахсаары турар. Киинэни эдэр режиссер Консантин Тимофеев уһулла. Ураты саҥа киинэ туһунан кэпсэтиибитин ааҕыҥ. edersaas.ru
— “Хара бэкир” сюжета ханнык даҕаны атын киинэҕэ майгынныа суохтаах диэн толкуйдаах сценарий суруйан саҕалаабытым. Хас даҕаны сылы быһа бу маннык хабааннаах киинэни устубут киһи диэн саныы сылдьбытым. Онтон сценарийын суруйан баран киинэни билээччилэргэ аахтаран көрбүтүм — сөбүлээбиттэрэ. Биир үксүн эдэр дьоҥҥо интэриэһинэй буоллун диэн уһуллубут. Голливуд устар киинэлэригэр майгынната сатаатыбыт. Сюжета атын сахалыы киинэлэртэн ураты. Сахалыы киинэлэр сюжеттара мөлтөх буолан, биир түбэлтэни чааһы-балтараа чааһы быһа көрдөрөллөрө көрөөччүгэ интэриэһи тардыбат дии саныыбын.
— Бу киинэҕитин хаһааҥҥыттан устан саҕалаабыккытый?
— Дьокуускайга олохсуйбутум уон сыл буолла, ол эрээри биирдэ даҕаны манна толору кээмэйдээх киинэни устубатаҕым. Онон сиэттэрэн үс сыллааҕыта устан саҕалаабыппыт. Устуу үлэтин биир ыйынан бүтэрбиппит, онтон таҥыыта, оҥоруута элбэх бириэмэни ылар. Үбүлээһинин барытын бэйэм уйуннум, биир мөлүйүөн солкуобай харчы барда. Ороскуоппун сабыныам диэн эрэнэбин.
— Сахаларга былыргыттан хара бэкир диэн өйдөбүл баар, эн киинэҕэр бу туох сыһыаннааҕый?
— Кырдьык, үүтээҥҥэ хоно сытар булчуту хара бэкир киһи дуу, абааһы дуу киирэн куттаабытын, моһуоктаабытын туһунан үһүйээннэртэн истэбит. Оннук курдук биһиги киинэбитигэр эмиэ биллибэт киһи туох сыаллаах-соруктаах дьону моһуоктуурун туһунан кэпсэнэр. Ол эрээри, биһиэнэ — киһи, абааһы буолбатах, маасканы кэппит киһи. Баҕар, ону сорох дьон абааһы оҥоро сатаабыттара табыллыбатах дии саныахтара, оннук буолбатах. Киинэбит жанра триллер буолар.
— Артыыстары хайдах талбыккытый?
— Киинэ сценарийын бэйэм суруйбутум, ол олорон хас биирдии оруолу номнуо кимҥэ анаан суруйарбын толкуйдуу-толкуйдуу суруйбутум. Арай аккаастанан кэбистиннэр диэн сэрэхэчийэ санаабыттааҕым, хата, артыыстарым бары сөбүлэһэн, бэртээхэйдик соруктарын толордулар. Билиҥҥи ыччат хайдах саҥарарын курдук, кинилэр ылыналларын гына, киинэҕэ нууччалыы уонна сахалыы тылынан булкуйа кэпсэтэллэр.
— Киинэҕэр кимнээҕи кытта үлэлээтиҥ? Анал үөрэҕэ суох артыыстары кытта үлэлэһэр хайдах эбитий?
— Операторынан доҕорум Виктор Ли Фу олус кыһаллан, атын үлэтин, дьиэтин-уотун умнан туран үлэлээтэ. Киинэбэр, кырдьык, үксэ идэтийбэтэх артыыстар оонньоотулар. Саха сиригэр айылҕаттан талааннаах дьон бааллар даҕаны эбит диэн сөхтүм. Холобура, Лиза Газизова олус энергиялаах, оруолугар олус чэпчэкитик киирдэ. Кинини артыыс буолан ананан кэлбит эбит дии санаатым, камера Лизаны наһаа ылынар, кадрга барытыгар табыллар. Саха киинэлэригэр куруук биир артыыстар оонньууллар, көрөөччүлэрбит хал буоллахтара буолуо. Интэриэһинэй, саҥаттан-саҥа сирэйдэри көрөр быдан буоллаҕа дии. Дима Ковальский бэйэтин идэтинэн учуутал, ол эрээри сирэйин олоруута, быһыыта-таһаата омук артыыһын курдук. Күөгэйэр күнүгэр сылдьар киһи, ханнык баҕарар киинэҕэ табыллан артыыстыан сөп эбит диэн түмүккэ кэллим. Уопсайынан, Саха сиригэр киинэҕэ уһуллуон айылаах дьон олус элбэх эбит, ону сөптөөх киинэ индустрията суоҕа атахтыыр. “Хара бэкири” устубут бөлөххө, артыыстарга улахан махталбын тиэрдэбин.
— “Хара бэкир” киинэ хайдах тарҕаныай? Өрөспүүбүлүкэ олохтоохторо бары көрөр кыахтаахтар дуо?
— Киинэбит Дьокуускай киинэ тыйаатырдарынан эрэ көстүөҕэ, улуустарынан тарҕаммата буолуо. Кэлин диискэнэн таһааран тарҕатыахпытын, бу эмиэ барыһа суох дьаһаныы буолар. Билигин үгүс дьон киинэ флешканан тарҕанарын дуу, босхо интэриниэккэ тахсарын дуу күүтэр, оннук буолуо суохтаах. Дьон саха киинэтин киинэ тыйаатырыгар үчүгэй хаачыстыбаҕа кэлэн көрөр “идэлэнэрэ” буоллар, оччоҕуна киинэ бөҕөтө тахсыаҕа, саха киинэтин хамсааһына түргэтиэ этэ дии саныыбын.
— Эйигин өссө норуокка клипмейкер быһыытынан, сахалыы килииптэри устан саҕалааччы быһыытынан билэллэр. Билигин дьарыктанаҕын дуо?
— Үөрэхпин саҥа бүтэрэн бараммын күүскэ ылсыбытым, ол курдук, Уля Сергучеваҕа, Джидаҕа, Индираҕа килиип устубуппут. Артыыстарга килиип устар наада диэн өйү-санааны киллэрэ сатаабытым, онтум табыллыбыта. Билигин клип устабын, ол эрээри ардыгар босхо үлэлиибин. Интэриэһинэй ырыалаах дии санаабыт ырыаһыппар сюжет толкуйдааччыбын.
— “Хара бэкир” — киинэни устууга бастакы уопутуҥ буолбатах. Тоҕо куруук абааһылаах, кутталлаах киинэлэри устаҕын?
— Оҕо эрдэхпиттэн бу эйгэни олус интэриэһиргиибин. Стивен Кинг кинигэлэрин почтанан сакаастаан ааҕарым. Урут “Сибиэннээх сир”, “Хараҥа хос”, “Паранормальный Якутск” диэн киинэлэри устубутум.
— Атын жанрдаах киинэни устуоххун баҕарбаккын дуо? Холобура, биир эмит саха суруйааччытын айымньытыгар олоҕуран?
— Бу киинэбин таһааран баран кыратык сынньаныахпын баҕарабын. Ол эрээри, киинэ устуу диэн ыарыы курдук, биир-икки ый сынньаммыта буолан баран эмиэ хамсаныаххын, тугу эрэ толкуйдуоххун, устуоххун баҕарбытынан бараҕын. Ардыгар тыаҕа дьоммор тахсан сынньаныахпын баҕарааччыбын, аны оччотугар үлэ барыта тохтуур, ыһыллыахча буолар. Эдэр эрдэхпинэ, кыаҕым баарына үлэлии сатыыбын. Атын жанрдаах киинэни устар туһунан санаалаахпын. Холобура, саха кыыһын, таптал туһунан сюжеттары өйбөр илдьэ сылдьыбытым ыраатта. Биир биллэр саха айымньытынан киинэ устуохпун баҕарабын. Толкуйдар бааллар, бириэмэ көрдөрүө, тоҕоостоох кэм үүннэҕинэ устуоҕум.
Айтана Аммосова кэпсэттэ.
Хаартыскалар дьоруой архыыбыттан туһанылыннылар, edersaas.ru