Киин куорат оскуолаларыгар үс нэдиэлэ устата уһаабыт харантыын түмүктэннэ. Олунньу 6 күнүттэн бары оскуолаларга 1-11 кылаастарга үөрэх саҕаланар.
Надежда ЕГОРОВА, «Саха сирэ» хаһыат, edersaas.ru
Дьокуускай к. санитарнай-эпидемияны утары охсуһар хамыыһыйата ыыппыт хааччахтыыр дьаһаллара, биллэн турар, туһалаах буоллулар. Гириип уонна ОРВИ курдук түргэнник тарҕанар дьаҥҥа сыстар кыах биллэ аҕыйатыллан, үөрэнээччилэр ыарыһах ахсаанын улаханнык элбэппэтилэр. Ол эбэтэр, саҥа сыл үһүс нэдиэлэтигэр үөрэнээччилэр поликлиникаҕа көрдөрө кэлиилэрэ, бу иннинээҕи нэдиэлэҕэ тэҥнээтэххэ, аҕыйаабыта бэлиэтэннэ. Ол да буоллар, билигин даҕаны сэрэнэр, харыстанар миэрэлэри умнар сатамматын эмчиттэр сэрэтэллэр.
Саха Өрөспүүбүлүкэтигэр Роспотребнадзор управлениетын салайааччыта Маргарита Игнатьева иһитиннэрбитинэн, гириип уонна ОРВИ ыарыылар өрө турар кэмнэрэ кэлэригэр дьаҥы утары охсуһар быһыыны ыларга улахан болҕомто ууруллубута. Киин куоракка эмчиттэр баҕалаах дьоҥҥо быһыылары босхо биэрбиттэрэ. Үгүс салайааччылар эмчиттэри бэйэлэрин тэрилтэлэригэр ыҥыран, кэлэктииптэригэр быһыыны ылыы дьаһалларын тэрээһиннээхтик ыыттылар. Ол түмүгэр, ыарыы өрө туруон иннинэ 390 тыһыынчаттан тахса киһи (нэһилиэнньэ 41 бырыһыана) гирииби утары быһыы ылбыта.
Надежда ЕГОРОВА, «Саха сирэ» хаһыат, edersaas.ru