Саамай күүтүүлээх Саҥа дьылбыт бырааһынньыга чугаһаан, бу күннэргэ «Якутлесресурс» тэрилтэҕэ харыйа уонна бэс атыыга таҕыста.
edersaas.ru
Сорох ыаллар искусственнай харыйалары номнуо симээн, киэргэтэн эрэллэр. «Столичнай» ырыынакка, хаһаайыстыбаннай маҕаһыыннарга, атыы-эргиэн кииннэригэр дьуолка арааһа атыыланар. Ол эрээри, үгүс дьон дьиҥнээх харыйаны ордорор.
Саҥа дьыллааҕы харыйаны бэлэмнээһин күһүн саҕаланар. СӨ Ойуур сыһыаннаһыытыгар департамена иһитиннэрбитинэн, быйыл Алдан, Амма, Нам, Нерюнгри, Мэҥэ Хаҥалас улуустарын харыйата уонна бэһэ атыыга таҕыста. Уопсайа 3150 устууканы бэлэмнээтилэр.
Аукцион сүрүн кыттааччыта «Якутлесресурс» тэрилтэ исписэлииһин кытары төлөпүөнүнэн кэпсэтэ сылдьыбыппар, 1,5 м диэри уһуннаах харыйа сыаната 700 солк., 2 м диэри 900 солк., оттон 2 м үрдүк уһуннаах мас 1100 солк. быһыллыбыт. Бэс сыаната арыый да чэпчэки. Холобур, 1,5 м диэри – 400 солк., 2 м диэри – 700 солк., 2 м үрдүк – 900 солк.
Ахсынньы ортотугар «Сайсары» бааһынай ырыынагар атыыга таһаарыахтаахтар. Оттон тиэтэйбит, ыксаабыт дьон Дьокуускай куоракка Кеша Алексеев уулуссатын 9/1 дьиэтиттэн баран атыылаһыаххытын сөп.
Анивера АКИМОВА, edersaas.ru