Бу уонна полиция участковай боломуочунайдарын үлэлэрин туһунан муус устар 3 күнүгэр Ис дьыала министиэристибэтигэр буолбут пресс-конференцияҕа билиһиннэрдилэр.
Манна СӨ ИДьМ-тын полициятын начальнигын уопсастыбаннай бэрээдэги араҥаччылааһыҥҥа солбуйааччыта, полковник Олег Лебедь, ИДьМ участковайдар уонна сокуоннай саастарын ситэ илик оҕолор дьыалаларыгар отделын начальнигын солбуйааччы, подполковник Михаил Иванов уонна Дьокуускай куорат полициятын участковайдар уонна сокуоннай саастарын ситэ илик оҕолор дьыалаларыгар отделын начальнига, подполковник Александр Аммосов кытыннылар.
Олег Лебедь иһитиннэрбитинэн, 2017 сылга өрөспүүбүлүкэ үрдүнэн ис дьыала уорганнарыгар киирбит сайабылыанньалартан 83 тыһыынчатын участковайдар быһаарбыттар.
Нэһилиэнньэни кытта быһаччы алтыһар бу сулууспа полицейскайдарын «ис дьыала дьоҕус миниистирэ» диэн мээнэҕэ эппэттэр — бэйэлэрин учаастактарыгар бары кэриэтэ хайысханан кинилэр үлэлииллэр. Өрөспүүбүлүкэ үрдүнэн 471 участковай баарыттан, 108-һа — Дьокуускай куоракка.
Пресс-конференцияҕа бэлиэтээбиттэринэн, оҥоһуллубут буруйтан хас төрдүһүн участковайдар арыйаллар. Оттон итирдэр утахтары сокуоннайа суохтук атыылааһын хас иккис чахчытын учатсковайдар булаллар.
Буруйу арыйыыга биир холобуру санаттахха: бу дьыл тохсунньу 20 күнэ үүнэр түүнүгэр Кэбээйи улууһун Сангаар бөһүөлэгэр Советскай уулуссаҕа олорор киһиттэн «Ямаха-40» тыы мотуорун уорбуттар. Онто 130 тыһ. солк. тахса суумалаах эбит.
Оттон бу күннэргэ киин куорат полициятыгар Марха оройуонун Экспериментальнай уулуссатыгар ыаллар айдаарсалларын туһунан иһитиннэрии киирбит. Ыйыллыбыт аадырыска участковай тиийбит.
Кини иһитиннэриини бэрэбиэркэлиир кэмигэр айдааннаах дьон аттынааҕы ыалларыгар быһаарыы ыла тахсыбыт. Уонна ол ыалга киирэн, ориентировкаҕа биллэриллибит тыы мотуора сытарын өйдөөн көрбүт. Мотуору хантан ылбыттарын ыйыппытыгар, дьиэлээх хаһаайын аҕата улуустан өрөмүөннэтэ аҕалбытын туһунан эппит.
Ол эрээри, участковай мотуор торуостара толоостук быһыллыбыттарын уорбалыы көрбүт. Серийнэй нүөмэрин бэрэбиэркэлээбитэ — ол уоруллубут мотуор нүөмэрэ эбит. Инньэ гынан, ыал айдаанын туоһута уоруу туоһута буолан хаалбыт.
Дьэ, онуоха эрэ бу киһи кэпсээбит: тохсунньу бүтүүтүгэр биир атаһа эрийэн, киниэхэ мал уурдарарын туһунан эппит уонна сотору кэминэн ити тыы мотуорун аҕалбыт. Аҕыйах хонугунан кэлэн ылыах буолан барбыт.
Кэбээйи улууһуттан төрүттээх 25 саастаах урут сууттана сылдьыбыт киһини бэрт сотору туппуттар. Уорбаланааччы доппуруоска билиммитинэн, кини тохсунньу 19 күнүгэр Сангаарга тиийэ сылдьан, чааһынай дьиэттэн ити тыы мотуорун уорбут. Ол күн Дьокуускайга кэлэн, ити уорбут мотуорун Мархаҕа билэр киһитигэр илдьэн уурбут.
Участковайдар учуоттарыгар 10 тыһыынча тахса киһи турар — дьиэлэригэр айдаарар-содуомнуур эрэ буолбакка, кэтэбилгэ сылдьар дьон эмиэ.
Маныаха Олег Лебедь участковайдар доруобуйаларыгар, олохторугар сорох ардыгар куттал илэ-бааччы суоһуурун бэлиэтээн аһарда. Итиэннэ былырыын алтынньы 18 күнүгэр Муома улууһун Сааһыыр сэлиэнньэтигэр полиция участковай боломуочунайа Василий Бурцевы үлэлиир сиригэр баламаттык өлөрбүттэрин, киниэхэ Российскай Федерация судаарыстыбаннай наҕараадата — «Эр санаа» уордьана иҥэриллибитин туһунан ахтан аһарда.
Быһата, полиция участковай боломуочунайдара диэн — киһи кыһалҕатын быһаарыыга, көмөҕө бастакынан кэлэр полицейскайдар буолаллар.
Бу пресс-конференцияҕа өссө биири бэлиэтээн эппиттэрэ, ол — 2017 сыл атырдьах ыйыттан РФ Холуобунай кодексатыгар уларыйыы киириитэ: итирдэр утахтары сокуоннайа суохтук атыылааһын иһин бастакы сырыыга административнай эппиэккэ тардыллыахха сөп эбит буоллаҕына, хаттаан түбэстэххэ, Холуобунай кодекс 171.4-с ыстатыйатынан холуобунай эппиэккэ тардыллыахха сөп. Номнуо оннук икки дьыала баарыттан, бииригэр суут бириигэбэрэ тахсыбыт.
Бу — арыгыны хааччахтаммыт бириэмэни таһынан эрэ буолбакка, дьиэҕэ дуу, массыынаҕа дуу кистээн атыылыыр «туочукаларга» эмиэ сыһыаннаах.
Вера МАКАРОВА, «Саха сирэ» хаһыат, edersaas.ru
Хаартыска: Мария Васильева, СИА түһэриитэ.