Өрөспүүбүлүкэҕэ чугастааҕы кэмҥэ өрүһү туоруур 50 сир арыллара былааннанар. Мантан 7-тэ федеральнай, 4-дэ өрөспүүбүлүкэтээҕи, уоннааҕылара муниципальнай таһымнаахтар.
Өрүһү туоруур сирдэр СӨ Тырааныспарын уонна суол хаһаайыстыбатын министиэристибэтин бирикээһигэр олоҕуран аһыллаллар. Барыллааһын быһыытынан, СӨ Ыксаллаах быһыыга-майгыга управлениетын чахчыларынан, Хатас – Павловскай хайысхатынан кыһыҥҥы суол сэтинньи 21 күнүгэр аһыллыахтаах. Былырыын сэтинньи 18 күнүгэр аһыллыбыта. Билигин бу хайысханан суол хаһаайыстыбатын үлэһиттэрэ мууһу бөҕөргөтүүгэ үлэлии сылдьаллар.
«Бүлүү» федеральнай суол управлениетын үлэһиттэрэ иһитиннэрбиттэринэн, Үөһээ Бүлүү, Күндээдэ, Устье, Кириэстээх аннынан Бүлүү өрүһү, оттон Ньурба Дьаарханынан Марха өрүһү туорааһын ахсынньы 1 күнүттэн көҥүллэниэхтээх (4 туоннаҕа диэри). Халлаан туругуттан көрөн, кыраапыкка уларыйыы тахсыан сөп.
Анивера Акимова, «Саха сирэ» хаһыат, edersaas.ru