Бу сарсыарда Москваттан көтөн кэлээт, “Ты — супер” Россия НТВ ханаалын норуоттар икки ардыларынааҕы бырайыагар ситиһиилээхтик кыттыбыт “Хатан” бөлөх оҕолоро салайааччыларын Роман Кысылбаиковы кытта Бэчээт дьиэтигэр, Өрөспүүбүлүкэтээҕи медиа-кииҥҥэ пресс-конференция биэрдилэр.
Татьяна МАРКОВА, «Саха сирэ» хаһыат, edersaas.ru
Төһө даҕаны айантан сылайан, 2 аҥаар ый дьиэлэриттэн тэйэн сырытталлар, оҕолор бэрт сэргэх көрүҥнээхтэр, суруналыыстар ыйытыыларыгар үөрэ-көтө хоруйдууллар.
Пресс-конференцияны “Саха сирэ” хаһыат кылаабынай эрэдээктэрэ Чокуур Гаврильев иилээн-саҕалаан ыытта.
Маҥнай ансаамбыл салайааччыта Роман Гаврильевич Кысылбаиков, уопсайа 1500 сайаапка киирбититтэн сүүмэрдэнэн-сүүмэрдэнэн, I турга 92 кыттааччы хаалан, ол иһигэр “хатаннар” эмиэ, хайдах күрэхтэспиттэрин, “Машина времени” аатырбыт рок-бөлөххө солистаабыт Евгений Маргулис кэлэн кинилэри өйөөбүтүн, маҥнайгы тууру ситиһиилээхтик ааспыттарын, онтон II туурга уолаттарга Виктор Цой “Звезда по имени Солнце” ырыатын ыллаппыттарын итиэннэ бөлөх инники былааннарын туһунан кэпсээтэ.
“Кэскил”, “Бэлэм буол”, “Саха сирэ” хаһыаттар, “Хатан” сурунаал кэрэспэдьиэннэрин ыйытыыларыгар оҕолор дьоһуннаах эппиэттэри биэрдилэр.
Ол курдук, бу норуоттар икки ардыларынааҕы бырайыакка 2,5 ый устата кыттар кэмнэригэр Москваҕа элбэх саҥаны-сонуну көрбүттэрин, Москваҕа Саха Өрөспүүбүлүкэтин Бастайааннай бэрэстэбиитэлэ Юрий Куприянов кинилэри ыҥыран көрсүбүтүн, Москва устун экскурсия тэрийбитин махтанан кэпсээтилэр.
Москва анныгар Истринскэй оройуон Мансурово диэн бөһүөлэккэ баазаланан олорбуттар, манна НТВ ханаал тэрийиитинэн маастар-кылаастарга сылдьыбыттар, биир саастыылаахтарыгар, араас омук оҕолоругар бэйэлэрэ да маастар-кылаас биэрбиттэр.
Атын дойдулар, регионнар, бу ыраах Саха сириттэн сылдьар оҕолор араас музыкальнай инструменнарга үчүгэйдик оонньуулларын сөхпүттэр. “Хатан” бөлөх оҕолоро бэйэлэрэ ырыа, муусука суруйаллар, аранжировкалыыллар.
Оннук буолара чахчы, тоҕо диэтэххэ, өскөтүн бу Үөһээ Бүлүүтээҕи оҕо дьиэтэ 27 иитиллээччилээх эбит буоллаҕына, онтон 90 бырыһыана Н.Бойлохов аатынан Оҕо искусствотын оскуолатыгар үөрэнэр.
“Музыка – барыбытыгар!” бырайыакка кыттан, 15 үөрэнээччи баян, домбра, саксофон кылаастарыгар ситиһиилээхтик дьарыктанар.
Спорка да күүстээхтэрин көрдөрбүттэр. Ол курдук, футболга күрэхтэһии ыытыллыбытыгар, “Хатан” хамаандата барыларын кыайан-хотон, бастакы миэстэҕэ тахсыбыт.
Москваҕа сылдьар кэмнэригэр оҕолор оскуола бырагырааматыттан хаалбатыннар диэн, тэрийээччилэр “Ты-супер” бырайыак кыттыылаахтарыгар барыларыгар үөрэнэр усулуобуйаны тэрийбиттэр.
“Биһиги оҕолорбут үөрэхтэрин наар “4”, “5” сыаналарга түмүктээн кэлэн олороллор”, — диир Роман Гаврильевич.
Солист Володя Климовскай (электрогитара), 11 кылаас үөрэнээччитэ, ордук нуучча тылыгар уонна историяҕа эрэллээҕин, бу биридимиэттэри сөбүлүүрүн эттэ. Кини, инникитин муусукатын сайыннаран, салгыы үрдүк үөрэххэ киирэн үөрэнэр баҕалаах. Володя дойдуларыгар айанныахтарын эрэ иннинэ, бырайыак атын кыттааччыларын кытта, Улуу Кыайыы күнүгэр аналлаах клипкэ уһуллан кэллэ.
Оттон муусукаҕа теория өттүнэн бэлэмнээх Константин Оппоев (бас-гитара) авиация үөрэҕэр барар санаалаах эбит. Андрей Кириллин (ударнай инструменнар), Василий Климовскай (синтезатор), Айхал Федотов (саксофон) инникитин ханнык идэни талалларын быһаарына сылдьаллар эрээри, уолаттар, муусукаларыттан хайа да түгэҥҥэ, арааһа, арахсыахтара суоҕа.
Биллэрин курдук, ыам ыйыгар “хатаннар” Кремльгэ буолар гала-кэнсиэргэ кыттыахтара, оттон аны сайын дойдуларыгар ыытыллар өрөспүүбүлүкэтээҕи “Манчаары Оонньууларын” култуурунай бырагырааматыгар кыттыыны ылыахтара итиэннэ, СӨ Ил Дарханын быһаарыытынан, “Артек” Норуоттар икки ардыларынааҕы оҕо киинигэр сынньаныахтара.
Оттон күн иккис аҥаарыгар “хатаннар” СӨ Баһылыгын уонна Бырабыыталыстыбатын Дьаһалтатын салайааччыта Федор Борисовы кытта көрсүһүүгэ сырыттылар.
Кэпсэтии, сүрүннээн, инники былааннар, муусука, айар үлэ туһунан буолла.
“Хатан” ВИА салайааччыта Роман Кысылбаиков кыһалҕалары эмиэ таарыйда, ол курдук, Үөһээ Бүлүүтээҕи Оҕо дьиэтин материальнай-техническэй баазата мөлтөҕүн эттэ. Ону таһынан, бу талааннаах оҕолор айанныылларыгар үчүгэй тырааныспардара эмиэ суох эбит.
Көрсүһүү, кэпсэтии истиҥ быһыыга-майгыга ааста, айар куттаах оҕолор салгыы үөрэнэллэригэр, сайдалларыгар усулуобуйа тупсарыгар эрэл кыымын сахта.
Татьяна МАРКОВА, «Саха сирэ» хаһыат, edersaas.ru
Денис Попов (СИА) хаартыскаҕа түһэриилэрэ.