“Хатаннар” НТВ бырайыагар кыттыахтара

Бөлөххө киир:

Дойду телевизионнай эфирин лиидэрэ НТВ телеканал “Ты супер!” бырайыагын сүүмэрдиир түһүмэҕэ буолара олох аҕыйах хонук хаалла. Бу бырайыакка Саха сириттэн Үөһээ Бүлүүтээҕи детдом “Хатан”  вокальнай-инструментальнай ансаамбыла кыттарын туһунан истибиккит буолуо. Онон, олунньу 11 күнүгэр 20:00 чаастан “Ты супер!”  музыкальнай шоу премьератын кэмигэр “хатаннарга” бука бары ыалдьыахпыт.

Татьяна Маркова, «Саха сирэ» хаһыат, https://edersaas.ru/

“Хатаннар” диэн кимнээҕий?  Билбэт дьоҥҥо быһаарыаҕыҥ.

Бу вокальнай-инструментальнай ансаамбыл Үөһээ Бүлүүтээҕи оҕо дьиэтигэр 2010 сыллаахха тэриллибитэ. Бастакы көлүөнэ эдэр музыканнар билигин бары улаатан, үөрэхтэнэн, ыал буолан, өрөспүүбүлүкэ, дойду араас куораттарыгар, улуустарыгар үлэлии-хамсыы сылдьаллар.

Бу оҕолор аан бастаан 2011 сыллаахха “Саҥа ырыа” интерактыыбынай күрэххэ кыттан, “Мин сахабын” (солист Саша Жданкин) ырыаларынан лауреат буолбуттара. Дьэ, онтон ыла, норуоттар икки ардыларынааҕы, дойду,  өрөспүүбүлүкэ, улуус араас куонкурустарыгар, фестивалларыгар кыайаллар, гран-при, лауреат буолаллар, мэлдьи ситиһии көтөллөнөн, кыайыы-хотуу аргыстаналлар. Састаапка саҥаттан-саҥа оҕо кэлэ турар.

— Оҕолору салайан, дьарыктаатахпытына, туох эрэ тахсыыһы диэн, бэйэтэ ис-иһиттэн музыканы олус сөбүлүүр, араас инструменнарга эҥкилэ суох оонньуур, ырыа-музыка куттаах биир идэлээхпитигэр Роман Гаврильевич Кысылбаиковка этии киллэрэммит, устуудьуйа арыйан, дьарыктанар усулуобуйалары барытын тэрийэн, дьоҕурдаах оҕолору түмэн,  “Хатан” диэн ааттаах ансаамбыл баар буолбута. Онтон ыла бу 7 сылы быһа “Хатан” – биһиги детдоммут визитнэй хаартыскатын кэриэтэ буолла.

Уопсайынан, мeдицинаҕа да, педагогикаҕа да “музыкальнай терапия” диэн тиэрмин баар. Оҕо сөбүлүүр көрүҥүнэн – музыканан, ырыанан дьарыктаныыта, музыкальнай инструменнарга оонньооһуна – бу барыта киниэхэ үөрэҕэр, уопсай сайдыытыгар, доруобуйатыгар эмиэ саамай үчүгэй эрэ өттүнэн дьайар. Биһиги үөрэнээччилэрбитин урут музыкальнай оскуолаҕа наһаа ыла сатаабат эбит буоллахтарына, билигин үөрэ-көтө ылаллар.

Оттон НТВ куонкуруһун туһунан сурук тэрийээччилэртэн биһиги электроннай почтабытыгар кэлбитэ. Ол усулуобуйатынан, биһиги видеоматырыйаал ыыппыппыт. Ахсынньы 24 күнүгэр I түһүмэххэ кыттарга ыҥырыы туппуппут. Олус элбэх сайаапка киирбит этэ, балтараа тыһыынчаҕа чугаһыыр курдук. Онтон бастакы сүүмэрдиир түһүмэх кэнниттэн 90-н эрэ, ол иһигэр биһиги оҕолорбутун, талан ылбыттара. Билигин оҕолорбут музыкальнай салайааччыбыт Роман Гаврильевич Кысылбаиков уонна социальнай педагогпут Маргарита Герасимовна Цой салалталарынан бырайыак Москва аттынааҕы базатыгар тиийэн, куонкуруска бэлэмнэнэ сылдьаллар. Үөрэнээччилэрбитигэр ситиһиини баҕарабыт.  Профессиональнай педагогтар үөрэтиилэрэ хаһан даҕаны таах хаалыа суоҕа,— диир Үөһээ Бүлүүтээҕи оҕо дьиэтин дириэктэрэ, РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна  Петр Николаевич Бубякин.

Билигин “Хатан” ВИА үһүс састаабыгар киирэллэр:

Солист, электрогитара – Владимир Климовскай, 16 саастаах.

Бас гитара – Константин Оппоев, 17  саастаах.

Ударнай инструменнар – Андрей Кириллин, 16 саастаах.

Синтезатор – Василий Климовскай, 13 саастаах.

Саксофон – Айхал Федотов, 15 саастаах.

Куонкуруһу Android уонна ios “Ты супер!” сыһыарыытынан кэтээн көрүөххэ, сөбүлүүр ырыаһыккар куоластыахха сөп.

Татьяна Маркова.

 Ыспыраапка:

Үөһээ Бүлүүтээҕи оҕо дьиэтэ 1943 сыллаахха, дойдуга Аҕа дойду Улуу сэриитэ күүдэпчилэнэ турдаҕына аһыллыбыта. Манна Саха сирин араас муннуктарыттан сэрии тулаайахтара-оҕолор түмсүбүттэрэ, детдом үлэһиттэрэ оҕолорго дьиҥнээх ийэ-аҕа буолбуттара.

Билигин бу, Үөһээ Бүлүү сэлиэнньэтигэр Сэбиэскэй уулусса 17 N-гэр турар оҕо дьиэтигэр өрөспүүбүлүкэ араас улуустарыттан  тулаайах уонна төрөппүттэрин көрүүтэ-истиитэ суох хаалбыт 27 оҕо иитиллэр.

+1
0
+1
0
+1
0
+1
0
+1
0
+1
0
+1
0