Ардыгар киһи олоҕо кыл түгэнтэн, «көмүс мүнүүтэлэртэн» тутулуктанар. Хатас сэлиэнньэтэ төһө да сырдык, ыраас балыыһалааҕын иһин, «суһал көмөҕө» наадыйар ыксаллаах мүнүүтэлэр тирээн кэлэллэрэ баар суол. Оччоҕо Дьокуускай куоракка балыыһаҕа бэйэҥ массыынаҕынан эбэтэр таксинан киирэргэ, эбэтэр куораттан кэлэр «суһал көмө» массыынатын күүтэргэ күһэллэриҥ.
edersaas.ru
Билигин Хатас эрэ буолбакка, куорат чугаһынааҕы нэһилиэктэр олохтоохторо сүргэлэрэ көтөҕүллэн сылдьар. Ол курдук, өр кэмнэргэ туруорсубут «суһал көмө» подстанцията бэйэлэригэр баар буолла – суһал медицинскэй көмө киинин подстанцията Хатас с. аһылынна.
Бу кэрэ бэлиэ түгэн сиэригэр-туомугар Дьокуускай к. доруобуйа харыстабылын управлениетын начаалынньыга Леонид Апросимов, СӨ Доруобуйа харыстабылын министиэристибэтин кылаабынай хирура Алексей Сидоров, Хатас с. баһылыга Прасковья Козлова, 3 №-дээх поликлиника кылаабынай бырааһа Светлана Давыдова, «Суһал медицинскэй көмө» станциятын кылаабынай бырааһа Татьяна Андросова уо.д.а. кытыннылар.
Станция үлэһиттэрэ Табаҕа, Владимировка, Пригороднай с. олохтоохторун хааччыйыахтара, суукканы быһа үлэлиэхтэрэ.
Суһал көмө 4 биригээдэтигэр уопуттаах быраастар талылыннылар, наадалаах медицинскэй тэриллэр ылылыннылар.
«Суһал көмө» подстанцията олохтоохторго медицинскэй көмө хаачыстыбатын тупсарарга, ыарыһах түргэнник үтүөрэригэр, инбэлииккэ тахсыы аҕыйыырыгар улахан көмөлөөх буолуоҕа.
Надежда ЕГОРОВА, «Саха сирэ» хаһыат, edersaas.ru