Дьокуускай куоракка американскай «Хилтон» гостиница тутуллуута: сир баар, тутааччы баар, үлэлэтээччи баар, харчы — суох…
edersaas.ru
Миниистир Антон Сафронов санаатын маннык үллэстэр:
— Hilton Worldwide (Хилтон Ворлдвайд) диэн норуоттар икки ардыларынааҕы гостиница брендин уонна Турция EKSI Group (Экси-групп) тэрилтэлэрин кытта сүбэ кэпсэтии түмүгүгэр анал Боротокуолга илии баттастыбыт. Hilton Worldwide хампаанньа аатыттан Арассыыйа уонна Холбоһуктаах дойдулар сайдыыларыгар эппиэттээх ыстаарсай дириэктэр Владимир Ильичев уонна EKSI Group аатыттан хампаанньа президенэ Хасан Экси кыттыыны ыллылар. Москваҕа ыытыллыбыт көрсүһүүгэ 6 700 кв м иэннээх 8 мэндиэмэннээх монолит-каркас тутуулаах 150 нүөмэрдээх гостиница бырайыагын туһунан кэпсэтии буолла. Тутуу бырайыагын үбүлээһинэ 1 млрд солк тахса буолара сабаҕаланар. Тутууну ыытыахтаах EKSI Group Турция хампаанньата Hilton Worldwide тэрилтэ сөбүлэҥин ылла. СӨ Бырабыытылыстыбата уонна Дьокуускай куорат гостиница тутуутугар өйөбүллэрин биллэрдилэр. Туризмы сайыннарыыга туһуламмыт суолталаах эбийиэк тутуллар сирэ быһаарылынна. Аны тутуу үбүлээһинин уйунар инвесторы булуу соруга турар. СӨ инвестиционнай сайдыытын агенствота, «Дьокуускай куорат» муниципальнай уокурук уонна СӨ баайга-дуолга уонна сиргэ министиэристибэтин салалталара сүбэлэһэн баран, гостиницаны Дьокуускай куорат киинигэр Лермонтов уонна Петр Алексеев уулуссаларын быысаһыыларыгар тутарга быһаарыныы ылыммыттара.
Инвестиция сайдыытын уонна предпринимательство министиэристибэтэ гостиница тутуугар олунньуттан ыла олохтоох инвесторы көрдүүр. Миниистир Антон Сафронов бэлиэтииринэн, «Сэттэ», «Якутцемент» уонна «Утум+» тутууну ыытар хампаанньалары кытта кэпсэтии ыыппыттар. Ол эрээри Hilton Worldwide хампаанньа туруорбут ирдэбилин кытта олохтоох хампаанньалар сөбүлэспэтэхтэрин түмүгэр үйэлээх тутуу боппуруоһа билигин да быһаарыыга сылдьар. Онон Hilton Worldwide тэрилтэ салалтатын кытта Москваҕа Саха сирин күннэрин чэрчитинэн көрсөн, СӨ инвестицияҕа уонна предпримательствоҕа миниистирэ Антон Сафронов гостиница тутуутугар кэккэ боппуруостары дьүүллэстэ.
«Саха сирин тутааччыларын сойууһа» тэрилтэ салалтата Турция EKSI Group хампаанньатын кытта кэпсэтии ыыппыта. Бу тутуу хампаанньата Малайзияҕа, Арабскай Эмираттарга, Нигерияҕа, Саудовскай Аравияҕа уонна да атын дойдуларга улахан тутуулардааҕынан биллэр.
Боппуруос быһаарыллыар диэри Hilton Worldwide тэрилтэ салалтата туристары көрсүүгэ, кинилэр олорор усулуобуйаларын хааччыйарга, көрөргө-истэргэ анаан 70 киһини гостиница сервиһигэр үөрэтиэҕэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.