Медицинскэй наука доктора, СӨ үтүөлээх бырааһа Иннокентий Иннокентьевич Винокуров тарбаҕар талааннаах хирурун сэргэ, кэнники сылларга айар үлэҕэ сорунуулаахтык киирсэн үлэлиир.
Надежда ЕГОРОВА, «Саха сирэ» хаһыат, edersaas.ru
Ааспыт сыл бүтэһигэр «Бичик» кинигэ кыһатыгар Тагус диэн псевдонимнаах прозаик «Үс саха төрдө» («Предки якутов») диэн кинигэтэ бэчээттэнэн таҕыста. Иннокентий Винокуров-Тагус бу историческай хабааннаах арамааныгар былыргы ХII-ХIII үйэлэр кирбиилэригэр үс улахан уус өһөх хааннаах кыргыс кэмигэр сэрии былдьаһыктаах дьалхааныгар оҕустаран, Саха сирин булан биир сомоҕо омугу үөскэппиттэрин туһунан бэйэтин уратылаах көрүүтүн уустаан-ураннаан ойуулаан ааҕааччы дьүүлүгэр таһаарбыт.
«… Дьылҕа хаан ыйааҕынан, киһиттэн улахан тутулуга суох кэм-кэрдиис хаамыытын ситимигэр сөп түбэһиннэрэн, сир-дойду үрдүнэн сабардаан кэлэр сайдыыны, эбэтэр төннөр кэхтиини кэрэһилээри икки туспа өрүттээх, уһун мөккүөрдээх күөн көрсүһүүлэр саҕаламмыттар, олор аны да салҕаныахтара турдаҕа. Ити балысханнаах хамсааһыннар киһи аймах чуумпу олоҕун аймаан, абылаҥнаах санаанан салайтаран, холоруктуу өрө ытыйан, бэйэ туһа диэн хаан тохтуулаах кыргыс сэриини тэрийбиттэр. Ол былдьаһыктаах түгэннэргэ улахан омуктар кыра аҕа ууһунан бытарыйан олорор омуктары күүстэринэн баһыйа тутан, бэйэлэригэр холбоон, былыргы үгэстэрин, тылларын-өстөрүн тосту умуннаран, атын омук буолуохтарыгар диэри симэлитэ сүтэрдэхтэрэ…», – диэн аан тылыгар суруйан, ааҕааччыны кыргыс сэриитин саҕаланыытыгар сиэтэн киллэрэр…
ЫСПЫРААПКА:
Эбэҥки норуотун чаҕылхай уола, Өлөөн улууһуттан бастакы доктор «Любовь в яранге» диэн кинигэтэ 2013 с. тахсыбыта. Нууччалыы арамааҥҥа Уһук Хотугу акыйаан кытылларыгар көһөн кэлбит норуоттар уонна көс биистэр олохсуйуулара арамаан дьоруойдарын олохторунан, сыһыаннарынан итэҕэтиилээхтик кэпсэммитэ.
Иннокентий Винокуров – дэҥҥэ көстөр монография, быраастарга методическай ыйынньыктар уонна босуобуйалар, 70-н тахса бэчээттиммит үлэ, хирургияҕа саҥа ньымалары толкуйдааһыҥҥа 4 патент ааптара. Кини чинчийэр уонна салайар дьоҕурун «Фтизиатрия» НПК тыҥа-хирургическай отделениетыгар хирург ыарахан үлэтин кытары сатабыллаахтык дьүөрэлиир.
Надежда ЕГОРОВА, «Саха сирэ» хаһыат, edersaas.ru