Сыана бэлиитикэтин кэмитиэтэ бигэргэппит тарыыбын (1000 солк.) утаран, бүгүн (ыам ыйын 12 күнүгэр) «Хивус» суудуналаах урбаанньыттар аны собостуопканы саҕалаатылар. Дьону эрэйдии, «сыһыта» түһэр санаалаахтар, быһыыта. Биир тыһыынчаҕа сөп буолбакка, урбаанньыттар иккилии тыһыынчаны ылан тэйэр санаалаахтар.
Анивера Акимова, «Саха сирэ» хаһыат,https://edersaas.ru
Ол эрэн, суудуналаах урбаанньыттартан лицензияларын ким да былдьыы илигин туһунан СӨ Тырааныспарын уонна суол хаһаайыстыбатын министиэристибэтин исписэлиистэрэ эттилэр. Маны таһынан Дьокуускай — Аллараа Бэстээх хайысхатынан пассажирдары таһыыга бөртөлүөтү кэпсэтии бара турарын биллэрдилэр. Итиэннэ Аллараа Бэстээххэ Дьокуускай куорат 202-с микро-оройуонуттан КАЙМАН-10 диэн сымнаҕас сыттыктаах суудуна сылдьан эрэрин кэпсээтилэр. Тарыып — 1000 солкуобай.
Хас да сыллааҕыта судаарыстыбаннай «Ирбис» диэн эмиэ итинник эрээри лаппа улахан аал баар этэ. Онтуларын эппиэттээх дьон киһилии көрөн-истэн, алдьаппакка илдьэ сылдьыбыттара буоллар, чааһынайдары кытта конкуренция баар буолуо, маннык айдаан тахсыа суох этэ.
Эбэн эттэххэ
Тырааныспар министиэристибэтэ иһитиннэрбитинэн, Дьокуускай — Аллараа Бэстээх хайысхатынан бүгүн, атыннык эттэххэ, ыам ыйын 12 күнүгэр киэһээ 18 чаас 30 мүнүүтэҕэ бөртөлүөтүнэн бастакы рейс оҥоһуллуо. Дьокуускай аэропордуттан Аллараа Бэстээх Манньыаттааҕар диэри. Ыам ыйын 13 күнүгэр сарсыарда 10 чаастан Аллараа Бэстээхтэн көтүөҕэ. Билиэт сыаната 2000 солкуобай.
Анивера Акимова, «Саха сирэ» хаһыат,https://edersaas.ru