Ойох эрин биитэр дьахтар эр киһини кыыһырбыт уоҕар хобордооҕунан саайара, кырбыыра анекдокка кэпсэммитэ ыраатта. Оттон дьиҥ олоххо итинник «быһаарсыы» көннөрүллүбэт ыарахан содулга тиэрдэр.
Үөһээ Халыма улууһугар 43 саастаах дьахтарга суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, 2017 сыл алтынньы 18 күнэ үүнэр түүнүгэр Зырянка бөһүөлэгин биир дьиэтигэр бу дьахтар 56 саастаах билэр киһитинээн арыгылаабыттар. Ол олорон, дьахтар кыыһыран бурҕачыйан туран, бу сордооҕу чугуун хобордооҕунан төбөҕө охсубут.
Эр киһи хас да күн балыыһаҕа сытан, төбөтүгэр ылбыт эчэйиититтэн кыайан өрүттүбэккэ, онно тыына быстыбыт…
Суут мунньаҕын кэмигэр дьахтар буруйун толору билиммит уонна оҥорбутун кэмсиммит.
Суут кинини РФ Холуобунай кодексатын 111-с ыст. 4-с чааһынан, ол эбэтэр, киһи доруобуйатыгар ыарахан эмсэҕэлээһини соруйан оҥорон, сэрэҕэ суохтан өлүүгэ тиэрдиигэ буруйдааҕынан билинэн, буруйун сымнатар өрүттэри учуоттаан, 5 сылга уопсай эрэсиимнээх холуонньаҕа көҥүлүн быһарга уурбут. Бириигэбэр сокуоннай күүһүгэр киирэ илик.
Биһиги корр., «Саха сирэ» хаһыат, edersaas.ru
Хаартыска: интэриниэттэн.