Муус аннынан балыктааһыҥҥа холуонньалар үлэһиттэрин күрэхтэһиилэрэ муус устар 1 күнүгэр үһүс төгүлүн ыытылынна.
Вера МАКАРОВА, «Саха сирэ» хаһыат, edersaas.ru
Ыарахан үлэттэн аралдьыйа, ыраас салгыҥҥа сынньана, бу күн өрөспүүбүлүкэ Ленскэйдээҕиттэн ураты холуонньаларын уонна Силиэстийэлиир изоляторын сотрудниктара Хачыкаат сиригэр муһуннулар. Сылаас күн туран, дьон сүргэтэ көтөҕүллүбүт, үөрбүт-көппүт сирэйдэр элэҥнииллэр, онтон-мантан көрдөөх күлүү иһиллэр, оҕолор оонньоон-көрүлээн сүүрэкэлэһэллэр.
Күрэхтэһиини эҕэрдэ тылынан РФ Накаастабылы толорор федеральнай сулууспатын Саха сиринээҕи управлениетын начальнигын солбуйааччы, ис сулууспа полковнига Валерий Карабиневскай арыйда. Ити кэнниттэн күрэхтэһии кылаабынай судьуйата, ис сулууспа майора Алексей Никулин инструктаж ааҕан иһитиннэрдэ. Дьэ, онтон сигнальнай ракетанан ыппытын кэнниттэн, кыттааччылар балыктыыр сирдэригэр сүүрдүлэр.
Анал балаһыанньа быһыытынан, күрэхтэһии уопсай сирэ-уота уонна хамаандалар учаастактара былаахтарынан бэлиэтэммиттэр. Онон, үс чаас устатыгар хас биирдии хамаанда бэйэтин учаастагын иһигэр төһө баҕарар ойбон дьөлөрө көҥүллэммитэ.
Балыктааһыҥҥа бэриллибит бириэмэ түмүктэнэн, судьуйалар ким төһөнү бултуйбутун салапааҥҥа уган, ыйааһыҥҥа ыйаан мээрэйдээтилэр. Ол түмүгэр, саамай элбэх балыгы бултуйбут хамаанданы (3-с холунньа бастаата), саамай улахан балыгы (Николай Олейников, 3-с холуонньа), саамай кыра балыгы, саамай аҕа саастаах балыксыты (Юрий Какаулин, 1 холуонньа), саамай эдэр балыксыты (Антон Никулин) уонна балыксыт дьахтары (Тамара Рудых, СИЗО) быһаардылар.
Киһи астына, киэн тутта кэпсиир балыга бу күн, биллэн турар, хаптарбата. Син биир ол-бу тыас-уус, саҥа-иҥэ мэһэйдиир, толору чуумпу суох буоллаҕа. Сүрүннээн, алыһар, хаахынай, күстэх кэлбиттэр.
Күрэхтэһии ити көрүҥнэригэр кыайыылаахтары быһаарыы кэнниттэн буурунан ойбону дьөлүүгэ куоталастылар. Манна бастакынан дьөлөн, бастыҥынан Максим Жуков (6-с холуонньа) ааттанна. Балыгы аан бастакынан хаптарбыт уонна саамай кыра балыктаах киһинэн эмиэ бу сотрудник буолла.
Бу күн саамай көрдөөх түгэнинэн хамаандалар эстафетаҕа күрэхтэһиилэрэ буолла.
Уопсай түмүккэ бастакы миэстэҕэ Үөһээ Бэстээхтээҕи 3 №-дээх уопсай режимнээх холуонньа, иккискэ — Мохсоҕоллоохтооҕу 6 №-дээх кытаанах режимнээх холуонньа хамаандалара таҕыстылар, оттон үһүс миэстэҕэ хонбуойдааһын отдела тигистэ.
Үтүөкэннээх күн бэрт минньигэс балык миинин иһиинэн түмүктэннэ.
Вера МАКАРОВА, «Саха сирэ» хаһыат, edersaas.ru
Хаартыскалар: ааптар түһэриилэрэ.