Алтынньы 30 күнүгэр Сицилияҕа (Италия) Аан дойдутааҕы киинэ бэстибээлин чэрчитинэн, саха хомуһун туһунан режиссер Диего Паскаль Панарелло устубут “Дьол дьикти дорҕооно” (“Странные звуки счастья”) диэн документальнай киинэ премьерата буолла. Ити туһунан Хомус түмэлин дириэктэрэ Николай Шишигин иһитиннэрдэ.
edersaas.ru
Уопсайа 3000 киинэни көрбүттэр, онтон 350 талбыттар, номинацияҕа 12 киинэ тиксибит. Ол курдук, саха хомуһун туһунан киинэҕэ “Не немецкий полнометражный фильм” диэн номинацияны туттарбыттар.
Киинэни бэстибээл устата икки төгүл көрдөрбүттэр, 600 (түүнүн) уонна 400 (күнүһүн) миэстэлээх саалаҕа дьон толору киирбит. Тас дойду олохтоохторо улаханнык сэҥээрбиттэр. Норуоттар икки ардыларынааҕы атын бэстибээллэргэ, куонкурустарга кытталларыгар ыҥырбыттар.
Санатан эттэххэ, бу киинэни Бүлүү, Хаҥалас, Уус Алдан, Нам улуустарынан уонна Дьокуускай куоратынан сылдьан үстэ төхтөрүйэн туран кэлэн, үс сыл устата устубуттар. Сахалыыттан Англия тылыгар Хомус түмэлин үлэһитэ Елена Шишигина тылбаастаабыт.
Сүрүн оруолларга итальянец Диего Паскаль Панарелло, сахалартан СӨ норуотун маастара Реворий Чомчоев-Чөмчөө Уус, аан дойду виртуоз-хомусчута Спиридон Шишигин, Хомус түмэлин дириэктэрэ Николай Шишигин оонньообуттар.
Киинэҕэ бырадьаага эдэр итальянец туһунан кэпсэнэр. Хомус ураты алыптаах тыаһын истэн, хомус Олоҥхо дойдутуттан төрүттээҕин билэн, утуйар уутун да умнан туран Саха сиригэр кэлиэн баҕарар. Ол сылдьан муораҕа умсар уонна Саха сирин көрдөөн булар, Ирбэт тоҥҥо баар буолар. Кини хомус нөҥүө саха дуохуобунаһын үөрэтэр, салгыы киһи быһыытынан олоххо бэйэтин миэстэтин булар.
Киинэбит иһэ истээх, дириҥ устуоруйалаахтык уһуллубут. Ол курдук, маҥнай Бүлүүгэ кэлэ сырыттаҕына Чөмчөө Уус бэлэхтээбит хомуһун дойдутугар тиийэн алҕас тоһутан кэбиспит. Режиссер ити хомуһу бэйэтигэр олус чугастык ылынан, санаата түһэн, дьэ табыллыбат буоллум дии сырыттаҕына, сэрэйдэххэ, арааһа, олус интэриэһинэй буолан буолуо, режиссертан көҥүлэ суох Германияҕа телевизорынан версия оҥорон көрдөрбүттэр. Режиссер итинтэн букатын буорайар, биир сыл киинэ устарын тохтотор. Онтон дьэ ылсар.
“Дьол дьикти дорҕооно” (“Странные звуки счастья”) киинэни Дьокуускайга эһиил норуоттар икки ардыларынааҕы киинэ бэстибээлигэр көрдөрөр баҕа санаалаахтар.
Людмила ПОПОВА, “Саха сирэ” хаһыат, edersaas.ru