Rулун тутар 7 күнүгэр “Триумф” кииҥҥэ, Норуоттар икки ардыларынааҕы Саха-корейскай бастакы бэстибээл чэрчитинэн Хомус-баттл ыытылынна. Өрөспүүбүлүкэҕэ киэҥник биллэр хомусчуттар ансаамбылларын аныгылыы хайысханан куоталаһыыларын бастакы тэрээһинэ диэн бэлиэтиир оруннаах.
Людмила Попова, “Саха сирэ” хаһыат, https://edersaas.ru/
Үҥкүүгэ баттл (маастарыстыбаларын таһымын көрдөрөр куонкурус) үгүстүк ыытыллар. Аныгы кэм муодата диэтэхпитинэ даҕаны, сыыспаппыт. Ол курдук, хомус ансаамбылларын ортолоругар бастыҥы быһаарар сыаллаах Хомус-баттл ыытылынна. Ол эрээри, көннөрү куонкурустан уратыта диэн – кыттааччылар уун-утары туран, уочаратынан дьоҕурдарын, сатабылларын көрдөрөллөр. Тэрийээччилэринэн “Завод” (Ньургуйаана Яковлева) үҥкүү бөлөҕө уонна “Боотур” (Константин Барашков) кэнсиэрт агенствота буолаллар. Кыттааччылары аан дойдуга киэҥник биллэр хомусчуттар, Хомус түмэлин дириэктэрэ Николай Шишигин, Альбина Дегтярева, импровизатор-хомусчуттар Мария Данилова, Николай Жирков сыаналаатылар.
Аан дойдутааҕы Хомус түмэлин научнай үлэһитэ Туйаара Жиркова санаатын бу курдук үллэһиннэ:
— Тэрийээччилэр Хомус-баттл ыытыахпытын баҕарабыт диэн биһигини кытта сибээстэспиттэрэ. Тэрээһин аатыгар сөп түбэһэрин курдук, бастыҥтан бастыҥ ансаамбыллары кытыннарар сорук турара. Уопсайа түөрт ансаамбыл кытынна. Бастатан туран, ансаамбыл 15 киһиттэн итэҕэс оонньооччулаах буолуо суохтаах диэн ирдэбил турар. Урутаан эттэххэ, өрөспүүбүлүкэҕэ оҕолорго икки көрдөрүүлээх (образцовай) — Дьокуускай куораттан Оҕо айымньытын дьиэтин иһинэн үлэлиир “Этигэн хомус” (салайааччы А.С.Жиркова), Уус Алдан улууһуттан “Кэскил” (салайааччы М.М.Соловьева). Итиэннэ икки норуодунай ансаамбыл – Хаҥалас улууһун Төхтүрүттэн “Кэскил” (салайааччы А.Д.Перловская) уонна Нам улууһун Партизаныттан “Дьүрүл” (салайааччы В.В.Колесов) ансаамбыллара бааллар. Салайааччылары ааҕан туран, 124 киһи кытынна.
Ирдэбил быһыытынан ансаамбыллар иккилии нүөмэри толордулар. Ол курдук, сахалыы традиционнай ньыманан (сыыйа тардан төрүт дорҕооннору таһаарыы) уонна тута хоһуйуу (импровизация). Тута хоһуйууга оҕолор ансаамбыллара аныгылыы тэтиминэн ыһыылаах-хаһыылаах оонньоотулар. Оттон “Дьүрүллэр” кырыымпаны туһаныылара, хомус дорҕооннорун ордук тупсаран, киэргэтэн биэрдэ. Кыайыылааҕынан Намтан “Дьүрүл” норуодунай ансаамбыла таҕыста.
Дьүүллүүр сүбэ толоруу маастарыстыбатын, биир тэҥҥэ тардыыларын, тиэмэлэрин арыйыыларын уонна сыанаҕа тутта-хапта сылдьыыларын, таҥастарын-саптарын барытын сыаналаата.
Биирдиилээн кыттааччылар баттлга холонон көрүөхтэрин эмиэ баҕараллар эбит. Ордук ыччат өттө таҥаһын-сабын барытын туппутунан кэлбит этэ. Ол эрээри, эрдэттэн бастакы Хомус-баттлга ансаамбыллар эрэ күрэхтэһэллэр диэн биллэриллибит буолан, усулуобуйаттан туораабатыбыт. Инникитин биирдиилээн даҕаны кытыннарыахха сөп эбит диэн түмүккэ кэллибит.
Людмила Попова, “Саха сирэ” хаһыат, https://edersaas.ru/