Бэс ыйын 17 күнүгэр Чурапчы улууһун Хоптоҕо нэһилиэгэр худуоһунньук, муосчут, Саха АССР үтүөлээх диэйэтэлэ, И.Е.Репин аатынан Судаарыстыбаннай бириэмийэ лауреата Семен Пестерев төрөөбүтэ 100 сылыгар аналлаах «Алаастан тахсыбыт талааннар» диэн худуоһунньуктар өрөспүүбүлүкэтээҕи бастакы ыһыахтара буолуоҕа.
Ыһыах Хоптоҕо нэһилиэгиттэн төрүттээх худуоһунньуктар үтүө ааттарын үйэтитэр сыаллаах ыытыллар. Бу күн худуоһунньуктар ыһыах түһүлгэтигэр олорон эрэ ким айылҕаны, ким дьону-сэргэни ойуулаан куонкуруска кыттыахтара. Ону таһынан худуоһунньуктар улахан быыстапкалара тэриллиэҕэ. Ыһыах биир уратытынан талаҕынан олоппос оҥоруутугар күрэхтэһии буолуоҕа. Уран тарбахтаах иистэнньэҥнэргэ, чуор куоластаах тойуксуттарга, ырыаһыттарга, уһун тыыннаах оһуохайдьыттарга туспа куонкурус биллэриллиэҕэ. Маны сэргэ, спортивнай күрэхтэһиилэр ыытыллыахтара. Күрэхтэһиилэргэ аймахтар аҕа, ийэ ууһунан бириис туруораллара күүтүллэр.
Нэһилиэнньэ ыһыахха бу сааскыттан тура тэбинэн бэлэмнэннэ. Ол курдук, муус устарга Петр Романов төрөөбүтэ 115 сылын көрсө улахан быыстапка тэриллибитэ, араас тэрээһин ыытыллыбыта. Бу ыһыахха бэлэмнэнэн олохтоохтор бөһүөлэги өрө тардан ыраастанан, ыһыахтыыр сирдэрин саҥардан биэрдилэр. Ону сэргэ, ыһыах бырагырамаатынан Хоптоҕо нэһилиэгин айар куттаах дьонуттан таҥыллыбыт уус-уран дьүһүйүү, кэнсиэр бэлэмнээтилэр. Манна нэһилиэк 200-тэн тахса олохтооҕо кыттыаҕа.
Манна даҕатан эттэххэ, Хоптоҕо нэһилиэгэ Дьокуускайдааҕы художественнай училищены, Саха сирин худуоһунньуктарын сойууһун, АГИКИ-ны кытары шефтэһэн үлэлээбитэ хаһыс да сыла. Ааспыт нэдиэлэттэн преподаватель Михаил Захаров салалтатынан то5ус устудьуон практикаларын бара сылдьаллар. Оҕолор практикаларын таһынан ыһыах тэрээһинигэр күүс-көмө буолаллар. “Билигин айар үлэтин үгэнигэр сылдьар Мэлдьэхситтэн төрүттээх муосчут, РФ уонна Саха сирин искусствотын үтүөлээх диэйэтэлэ, ССРС култууратын туйгуна Георгий Родионов күүс-көмө, сүбэ-ама буола сылдьар”, — диэн бэлиэтиир нэһилиэк баһылыга Дмитрий Дьячковскай.
Бу күн олимпийскай чемпион Павел Пинигин аҕата финскэй уонна Аҕа дойду сэриитин кыттыылааҕа, “Кыһыл Сулус”, “Албан аат” 3 степеннээх уордьаннарын кавалердара Павел Титович Пинигин бирииһигэр «Сайылык Эбэ» ипподромҥа саха уонна сиэнчэр аттарга сүүрүү ыытыллыаҕа. Кыайбыт ат хаһаайыныгар мотоцикл көлөнү тэбэн биэриэҕэ. Манна сыһыаран эттэххэ, иккис күн кини төрөөбүтэ 100 сылын көрсө аймахтар эмиэ улахан ыһыах ыһыахтара.
Ыспыраапка:
Хоптоҕо нэһилиэгэ норуот худуоһунньуга, уопсастыбаннай диэйэтэл, Саха сирин худуоһунньуктарын сойууһун тэрийбит, бастакы идэтийбит худуоһунньукпут Петр Романов, П.А.Ойуунускай аатынан Судаарыстыбаннай бириэмийэ лауреата, норуот худуоһунньуга Афанасий Мунхалов, РФ култууратын туйгуна, норуот маастара, Чурапчы улууһун Бочуоттаах олохтооҕо Ким Колесов, СӨ култууратын үтүөлээх үлэһитэ, худуоһунньук, норуот маастара, муосчут Роман Пинигин, муосчут, РФ үтүөлээх худуоһунньуга, СӨ үтүөлээх диэйэтэлэ, Саха АССР искусствотын үтүөлээх диэйэтэлэ Иннокентий Корякин, ССРС култууратын туйгуна Георгий Родионов, графиканан, живопиһынан дьарыктанар, РФ худуоһунньуктарын сойууһун чилиэнэ Надежда Федулова түөрэхтэрин түһэрбит, биһиктэрин ыйаабыт сирдэрэ буолар.
Быйыл Хоптоҕо нэһилиэгэр худуоһунньуктар бары да үбүлүөйдээх сыллара буолла. Ол курдук, Петр Романов 115, Семен Пестерев 100, Ким Колесов 80, Роман Пинигин 70 сыллаах үбүлүөйдэрэ бэлиэтэнэр.
Аграфена КУЗЬМИНА, «Саха сирэ» хаһыат, edersaas.ru