Хотторуу хомолтото, кыайтарыы кыһыыта

Бөлөххө киир:

Ааспыт быыбардарга кыайыы да үөрүүтэ, хотторуу да хомолтото баара. Сөп ээ, быыбар аата быыбар буоллаҕа, ким эрэ кыайтарыахтаах. Ол эрээри кыайыа диэн бүк эрэллээх сылдьыбыт хандьыдааттара кыайтарбыттарыгар, үгүстэр улаханнык соһуйбут, хомойбут буолуохтаахтар.

Биир саамай улахан кыайтарыынан Иван Шамаев Ил Түмэн дьокутаатын мандаатыттан маппытын ааттыахха сөп.

Үөһээ Бүлүүтээҕи-Горнайдааҕы уокурукка Ф.В. Габышева 48,22%, И.И. Шамаев 44,46%, В.П. Михайлов 5,49% куолаһы ылбыттар.

Иван Шамаев бу уокуруктан талыллан ааспыт сырыыга дьокутааттаабыта. Бу сырыыга быыбар буолуон иннинэ кинини уста сатаабыттара, улуус дьаһалтата, сүрүн баартыйа утары үлэлээбиттэрэ дьайбыт буолуон сөп. Холобур, күндү бириэмэтин, сыратын-сылбатын суукка бараабатаҕа буоллар, элбэх быыбардааччыны кытта сирэй көрсөн кэпсэтиэ хааллаҕа.

Ил Түмэҥҥэ Иван Иванович сытыы боппуруостары туруорарын, аһаҕастык киирсэрин уонна дьон-норуот интэриэһин көмүскүүрүн билэр буолан, дьокутаат мандаатыгар тиксибэтэҕэр үгүс киһи хомойдо.

Оттон Сардаана Авксентьева 39,98% ылбыт буоллаҕына, Александр Саввинов 31,70%-ны ылла. Онон Дьокуускай куорат

историятыгар аан бастаан дьахтар мэр баар буолла. Дьиҥинэн, “Биир ньыгыл Арассыыйа” чилиэнэ, Гордуума спикерэ мэр буолар  кыаҕа улахан этэ.

“Набережнай” уокурукка Мария Христофорова уонна Игорь Никитин сытыытык киирсибиттэрэ. Мария Христофорованы эмиэ эрдэ суутунан уста сатаабыттара сатамматаҕа. Урукку дьокутаакка, “Саханефтегазсбыт” тойонугар элбэх куолас бэриллиэ диэн кэтэспиттэрэ да, атын буолан тахсыбыта. Түмүгэр, М.Н. Христофороваҕа 45,55%, И.Ю. Никитиҥҥэ 38,58%, И.А. Синченкоҕа 9,82% киһи куоластаабыт.

Сунтаардааҕы уокурукка А.Ю. Николаев 57,70%, А.П. Яковлев 31,43%, Г.Е. Илларионов 7,12% ылбыттар. “Туймаада” хаһыат эрэдээктэрэ Александр Яковлев “Арктик капитал” генеральнай дириэктэрэ Андрей Николаевка кыайтарда. Манна эмиэ сытыы киирсиилэр буолуталаатылар.

Сорох улуустарга хандьыдааттар эрбии тииһин курдук эриспиттэр. Холобур, Өлүөхүмэтээҕи уокурукка А.П. Николаев 35,78%, Н.А. Ефимов-Владимиров 31,47%, Н.Н. Харбин 26,90% ылбыттар.  Оттон Алданнааҕы уокурукка Р.В. Солнышкина – 28,38%, Н.С. Миронов – 27,56% ылан, бэрт кыранан кыайбыт. Соччонон кыайтарбыт киһи кыһыыта улахан буолуохтаах.

Быыбардар түмүктэннилэр. Олох салҕанар. Аны билигин талыллыбыт дьокутааттар, салайааччылар быыбардааччыларын эрэллэрин толорон, Саха сирэ сайдарын туһугар кыайа-хото үлэлииллэригэр эрэнэ хаалабыт.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0