Кулун тутар 30 күнүттэн Дьокуускайга өрөспүүбүлүкэтээҕи III “Хотугу Arabesque” Оҕо искусствотын оскуолаларын (ДШИ) хореографическай салааларын куонкурустара саҕаланар.
Быйылгы 2018 сыллааҕы куонкурус Арассыыйаҕа Балет сылыгар уонна уһулуччулаах хореограф Мариус Петипа төрөөбүтэ 200 сылыгар ананар.
“Хотугу Arabesque-2018” куонкуруска кыттарга сайаапкалар өрөспүүбүлүкэ 14 улууһуттан уонна Дьокуускай куораттан киирдилэр.
Бу куонкурус сыалынан-соругунан талааннаах, айылгылаах оҕолору көрдөөн булуу уонна өйөөһүн, эбии үөрэхтээһин ситимигэр оҕолору хореографическай сайыннарыыны көҕүлээһин, оскуолалар хореографическай салааларын бастыҥ уопуттарын үөрэтии уонна тарҕатыы, уус-уран таһымы уонна толоруу хаачыстыбатын үрдэтии буолар.
Быйылгы “Хотугу Arabesque-2018” куонкуруһу аһыы бүгүн, кулун тутар 30 күнүгэр, сарсыарда 9:30 ч. 1 N-дээх ДШИ (Ярославскай аат. уул., 27) кэнсиэртиир саалатыгар ыытыллыаҕа. Бу күн, икки турдаах куонкурус I тура саҕаланыаҕа.
Икки күн устата барар фестиваль, куонкурус кыттыылаахтара маны таһынан маастар-кылаастарга, преподавателлэр квалификацияны үрдэтэр куурустарга сылдьыахтара, “төгүрүк остуол” тула олорон санаа атастаһыахтара.
Фестиваль “Хотугу Arabesque” кулун тутар 31 күнүгэр киэһэ 18 чаастан куонкурус лауреаттарын уонна дипломаннарын гала-кэнсиэрдэринэн түмүктэниэҕэ.
Ыспыраапка
“Хотугу Arabesque” куонкурус аан маҥнай СӨ Култууратын, духуобунай сайдыытын министиэристибэтинэн бигэргэтиллэн, Дьокуускайдааҕы 1 N-дээх ДШИ көҕүлээһининэн, СӨ Култууратын, духуобунай сайдыытын министиэристибэтин Үөрэхтээһиҥҥэ ресурснай киинин өйөбүлүнэн 2014 сыллаахха ыытыллыбыта. Бастакы куонкуруска уопсайа 385 үөрэнээччи, преподаватель уонна концертмейстер кыттыбыта.
Иккис куонкурус 2016 сыллаахха ыытыллыбыта. Фестивальга 363 оҕо “Бастыҥ норуодунай үҥкүү”, “Бастыҥ классическай үҥкүү”, “Бастыҥ аныгылыы истииллээх үҥкүү” уонна “Бастыҥ историко-бытовой үҥкүү” диэн 4 номинациянан кыттыбыта.
Татьяна МАРКОВА, «Саха сирэ» хаһыат, edersaas.ru
Хаартыскаларга: Ааспыт сыллардааҕы куонкурустар кыттыылаахтара