Атырдьах ыйын 7-9 күннэригэр Үс Хатыҥҥа «Сугулаан 2017-Маут» ыччат III форума ыытылла турар.
Надежда ЕГОРОВА, «Саха сирэ» хаһыат, edersaas.ru
Форумҥа Арктика оройуоннарыттан, Хотугу сир аҕыйах ахсааннаах норуоттара түөлбэлээн олорор сирдэриттэн уонна өрөспүүбүлүкэ 13 улууһуттан ыччат лиидэрдэрэ, устудьуоннар уонна эдэр исписэлиистэр муһуннулар. Сугулаан сүрүн соругунан Хотугу сир норуоттарын тирээн турар кыһалҕаларын быһаарыы уонна аҕыйах ахсааннаах норуоттар култуураларын оннунан хаалларарга, харыстыырга анаммыт бырайыактары олоххо киллэрии, дьүүллэһии буолар.
СӨ Госалкогольконтроль управлениета форум чэрчитинэн чөл олох туһунан семинары ыытта. Ыччакка туһалаах лиэксийэлэри управление исписэлиистэрэ, «Чөл олохтоох Саха сирэ» уонна «Саха сирэ арыгылааһыны утары» уопсастыбаннай хамсааһыннар актыбыыстара аахтылар. Управление мониториҥҥа уонна иһитиннэрэр-ырытар үлэҕэ отделын салайааччы Ульяна Булдакова уонна үрдүк категориялаах невролог-быраас, Чөл олох аан дойдутааҕы академиятын доцена Ида Белых сонун иһитиннэриилэрин сэргээн иһиттилэр.
Сугулаан бары кыттыылаахтарыгар арыгы, табах содулларын уонна бу куһаҕан дьаллыктартан босхолонуу ньымаларын туһунан сиһилии кэпсиир «Уопсай дьыала» диискэни бэлэхтээтилэр.
Управление салалтата уонна исписэлиистэрэ Хотугу сиргэ арыгылааһыны утарсар бэлиитикэҕэ эдэрдэр саҥа саҕалааһыннарын куруук өйүүр уонна көмөлөһөр.
Надежда ЕГОРОВА, «Саха сирэ» хаһыат, edersaas.ru