Бэҕэһээ, балаҕан ыйын 24-гэр, Дьокуускайга марафоҥҥа өрөспүүбүлүкэ чөмпүйэнээтэ уонна “Хотугу марафон” диэн күрэхтэһии холбуу бииргэ ыытылыннылар. edersaas.ru
Саха сирин араас улуустарыттан кэлбит отут биэс уҥмат тыыннаах, илистибэт иҥиирдээх сүүрүүк Култуура уонна сынньалаҥ пааркатыгар бэс ойуур быыһынан тыргыллар икки аҥаар биэрэстэ уһуннаах асфальт бүрүөһүннээх суолга илин-кэлин түһүстэ.
Старт бэриллээтин кытта Таатта быһыйа Альберт Варламов уһулу ойон тахсан сүүрүүнү баһылаабытынан-көһүлээбитинэн барар. Быйыл кинини кытта тэҥҥэ тутуһуох, тилэх баттаһыах сүүрүүк баара көстүбэтэ. Онон Алберт түөрт көстөн тахса уһуннаах дистанция былаһын тухары соҕотоҕун сырытта. Уонна, тэппит атаҕын кубулуппакка, биэтэккэ бастакынан кэллэ. Бириэмэтэ — 02.46.56.
Иккис буолбут Павел Пестряков (Дьокуускай) 02.55.30. көрдөрүүлэннэ. Күрэхтэһии арыйыытынан сүүрбэ икки саастаах Ньургун Софронов буолла диэтэхпинэ сыыспатым буолуо. Марафону аан бастаан сүүрбүт Горнай быһыйа дистанцияны үсүһүнэн түмүктээтэ. Бириэмэтэ даҕаны эдэр киһи холугар куһаҕана суох – 02.56.16.
Юрий Михайлов (Бүлүү, 03.01.22), Николай Дмитриев (Уус Алдан, 03.10.48), Дмитрий Ноговицын (Дьокуускай, 03.12.23) төрдүс, бэһис, алтыс миэстэлэри ыллылар.
Роман Попов, «Саха сирэ» хаһыат, ааптар хаартыскаҕа түһэриитэ