Бу күннэргэ «Ил Эйгэ» диэн кэрэ айылҕалаах сиргэ «ПРОФстарт-2018» диэн идэлээх сойуустар ыччаттарын өрөспүүбүлүкэтээҕи онус үбүлүөйдээх форумнара буола турар.
edersaas.ru
Тэрээһиҥҥэ өрөспүүбүлүкэ араас муннугуттан сүүсчэкэ актыбыыс кэлэн, уопут атастаһар, маастар-кылаастарга, сэминээрдэргэ кыттар. Ыччаттар дьиэтээҕи сорудахтарынан видео-бырайыак көмүскүөхтэрэ. Сорудах үтүө өрүтэ — биирдиилээн бырайыактар болҕомтоҕо ылыллан, олоххо киириэхтэрэ. Онон кыттааччылар интэриэстэрэ улахан.
«ПРОФстарт-2018» ыччат идэлээх сойуустарын форума быйыл үбүлүөйдээх 10-c сыла. 2008 сыллаахха идэлээх сойуустар ыччаттарын бастакы форума ыытыллыбыт.
— Тэрээһин сүрүн соруга – лиидэр, актыбыыс ыччаттары бииргэ түмүү. Эдэр дьон хаһан баҕарар үгүс этиилээх, сонун көрүүлээх буолаллар. Онон эһиги биһигиттэн, биһиги эһигиттэн үөрэнэбит. Форум үлэтин биир кэскиллээх хайысхата — бырайыак көмүскээһинэ. Мантан саҕыллар өрөспүүбүлүкэбит сайдыыта, кэскилгэ олугу ууруу. Онон, ыччаттар, кытаатыҥ, бу икки күн устата бэйэҕитин көрдөрүҥ, — диэн СӨ Идэлээх сойуустар федерацияларын бэрэссэдээтэлэ Николай Дегтярев ыччаттарга туһаайан ыҥырда.
Форум тэрээһинин көрүҥнэрэ бары үбүлүөйдээх 10 сыыппараны кытта ыкса сибэстээхтэр. Бу туһунан култуура уонна духуобунай сайдыы министиэристибэтин архыып дьыалатын тутаах исписэлииһэ уонна СӨ Идэлээх сойуустар федерацияларын иһинэн үлэлиир Ыччат сэбиэтин бэрэсэдээтэлин эбээһинэһин толорооччу Ирина Тергюлева маннык билиһиннэрэр:
— Быйылгы тэрээһиҥҥэ 100 кыттааччыны уоннуу хамаандаҕа уоннуу киһинэн араартаатыбыт уонна көхтөөх кыттааччыны талар инниттэн инники күөҥҥэ сылдьааччыларга «X»-тары биэриэхпит. Форум түмүгэр уон саамай элбэх «Х»-таах кыттааччыны талыахпыт. Кинилэргэ анал бириистэри бэлэмнээтибит. Маны таһынан, үгэс быһыытынан хас биирдии кыттааччы дойдутуттан оонньуур аҕалбыта, ону биһиги тубдиспансер оҕолоругар тиэрдиэхпит. Форум чэрчитинэн «Мисс и Мистер «ПРОФстарт-2018» диэн инстаграм нөҥүө куонкурус биллэрбиппит. Онон актыбыыс уонна көхтөөх ыччаттарга икки күннээх форум умнуллубат өйдөбүлү хаалларыаҕа.
«ПРОФстарт-2018» ыччат өрөспүүбүлүкэтээҕи X үбүлүөйдээх форума сарсын, от ыйын 8 күнүгэр, түмүктэниэҕэ.
Анжелика АЛЕКСЕЕВА, Евдокия СЛЕПЦОВА.
Хаартыскаҕа Анжелика Алексеева түһэриитэ.