Оҕуруктаах өйдөөх, сирэйэ-хараҕа суох дьон, дьэ, баар да буолар эбит! Киһи эрэ бэркиһиир! Кинилэр дьону албыннаабыттара туох да содула суох хааларыгар оччо эрэллээх буоллахтара дуу?
Биир оннук чиэһинэйэ суох киһиэхэ, буолаары буолан, коммерческай тэрилтэ генеральнай дириэктэригэр, суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, Бүлүү куораттан төрүттээх 36 саастаах киһи 2016 сыл муус устар 4 уонна 6 күннэригэр генеральнай дириэктэр дуоһунаһыгар үлэлиир кэмигэр икки ыалга ийэ хапытаалын суотугар чааһынай дьиэлэри тутуох буолан, дуогабар түһэрсибит. Ол эрэн, счетугар 900 тыһ. солк. тахса суумма киирбитин кэнниттэн, ити эбэһээтэлистибэлэрин толорбокко, харчыны барытын бэйэтин наадатыгар туттубут.
Били нууччаларга баар «аппетит приходит во время еды» диэн өс хоһоонугар этиллибитин курдук, дьону итинник сидьиҥник албыннаабытыттан суобаһа оонньоон көрбөккө, ити сыл от ыйыгар эмиэ чааһынай дьиэ тутан биэриэх буолан, аны үһүс ыалын кытта дуогабар түһэрсибит. Эмиэ 420 тыһ. солк. кэриҥэ харчыны тутаат, эмиэ барытын бэйэтигэр туһаммыт.
Суут мунньаҕар Дьокуускай куорат борокуратуурата түөкүнтэн ити буруйун иһин 1 мөл. 300 тыһ. солк. тахса суумалаах материальнай хоромньуну төлүүрүгэр туруорсубутун, суут толору өйөөбүт.
Суут буруйдаахха накаастабыл миэрэ быһыытынан, 4 сылга көҥүлүн быһары услуобунайынан ааҕан, 3 сыл тургутар болдьоххо уурбут.
Биһиги корр., «Саха сирэ» хаһыат, edersaas.ru
Хаартыска: интэриниэттэн.