close
“Ийэ тылбар, сахалыы саҥабар тирэҕирэн…” (ВИДЕО)...
Олох-дьаһах - Тыа сирэ

“Ийэ тылбар, сахалыы саҥабар тирэҕирэн…” (ВИДЕО)

Төрөөбүт тыл, сурук-бичик күнүн Уус Алдаҥҥа өрө көтөҕүллэн бэлиэтииллэр. Бу туһунан биһиэхэ Бороҕоннооҕу киин бибилэтиэкэ дириэктэрэ Варвара Окоемова иһитиннэрдэ.


Варвара Николаевна “Ийэ тылбар, сахалыы саҥабар тирэҕирэн…”  тэрээһин бэҕэһээҥиттэн саҕаламмытын бэлиэтиир. Бастакы күн уопсайа 11 тэрилтэ, 170-ча киһи кыттыыны ылбыт.

Биир нэдиэлэ устата улууспут нэһилиэктэринэн, тэрилтэлэринэн тэрээһиннэр тиһиктээхтик салҕаналлар. Оскуолаларга, бибилэтиэкэлэргэ, сынньалаҥ кииннэригэр библиотечнай уруоктар, быыстапкалар, бэсиэдэлэр, оскуолаларга кылаас чаастара, күөн күрэстэр олус сэргэхтик ыытыллаллар. Көрсүһүүгэ уһулуччулаах бэйиэт Г.Г.Вешников-Баал Хабырыыс төрөөбүтэ 100 сылын туоларынан кини олоҕун-дьаһаҕын, айар үлэтин туһунан сырдатабыт, — диэн кэпсиир кини.

Тэрээһиннэр “Тойон Мүрү” култуура, “Өркөн” оҕону эбии үөрэхтээһин кииннэригэр, СЭС, ОДьКХ тэрилтэлэригэр, социальнай управлениеҕа, реабилитационнай кииҥҥэ,  нэһилиэк дьаһалтатын, “Мүрү саһарҕата” айар-полиграфическай холбоһук дьиэлэригэр, о.д.а. ыытыллыбыттар.

Мүрү 1 №-дээх оскуолатыгар, “Мүрүчээнэ” оҕо уһуйааныгар “Ийэ тылбар, сахалыы саҥабар тирэҕирэн…” форумҥа “Сахалыы иитии уйулҕата” секцияларынан үлэ олус сэргэх буолбут. Манна саха тылын учууталлара, оскуола, нэһилиэк бибилэтиэкэтин үлэһиттэрэ, култуура үлэһиттэрэ, оҕо уһуйаанын иитээччилэрэ, төрөппүттэр кыттыбыттар. Кинилэр тирээн турар кыһалҕалары дьүүллэспиттэр, инники үлэ соруктарын кэпсэппиттэр, санааларын үллэстибиттэр. Быыстапка, кинигэ атыыта-тутуута мустубут дьону улаханнык сэргэхсиппит.

“Сыккыс” бибилэтиэкэҕэ “Айар иэйиигэ куустаран” литературнай күрэс, “Төрөөбүт тылгын төһө билэҕин?”  викторина болҕомтону тардыбыттар.   Бу күннэргэ нэһилиэктэргэ, тэрилтэлэргэ сахалыы диктант суруйуохтаахтарыттан дьон-сэргэ улаханнык үөрэрин, долгуйарын биллэрбит. Бороҕоҥҥо Т.Находкина “Үлэ – дьылҕам бэлэҕэ” кинигэтин сүрэхтэниитэ, Мүрү 1 №-дээх оскуолатыгар тыыл уонна педагогическай үлэ бэтэрээнэ В.М.Троева аатыгар аналлаах саха тылыгар уонна литературатыгар 4-с кылаас үөрэнээччилэригэр олимпиада, 2 №-дээх оскуолаҕа “Төрөөбүт тыл түмэр түһүлгэтэ” үөрэнээччилэр хамаанданан күрэстэһиилэрэ, о.д.а. тэрээһиннэр тиһиктээхтик салҕанан  ыытыллыахтаахтар. Кэлэр күннэргэ Суоттуга “Мичээр” сынньалаҥ киинигэр  С.Васильев-Борогонскай төрөөбүтэ 110 сылынан оҕолорго олоҥхону толорууга улуустааҕы күрэс буолуохтаах. Чараҥҥа бэйиэт, прозаик, драматург, литературнай критик А.Иванов-Күндэ төрөөбүтэ 120 сылынан киниэхэ аналлаах тэрээһиннэр, бэсиэдэлэр ыытыллаллара былааннаммыт.

Варвара Николаевна бэлиэтээн эппитинэн, төрөөбүт тыл, сурук-бичик күнүн чэрчитинэн, нэдиэлэ устатыгар лирик бэйиэт, САССР суруйааччыларын сойууһун чилиэнэ Г.Вешников-Баал Хабырыыс хоһооннорун күргүөмүнэн ааҕыыга улуус олохтоохторо көхтөөхтүк кыттарга бэлэмнэрин биллэрбиттэр.

Сардаана БАСНАЕВА, “Саха сирэ” хаһыат, edersaas.ru 

 

#бүгүн: 1
0
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

три + 4 =