Чэпчэки сыаналаах билиэти батыһан, Санкт-Петербург куораттан кэлэрбитигэр Новосибирскай нөҥүө стыковочнай рейсинэн эргийэр буоллубут. Көтөр бириэмэтэ иккиэннэрэ түүн, аара суолга тохтобула – биир күн. Хата, биһиги таһаҕаспытын барытын туттаран, куорат көрө таҕыстыбыт. Автобус сырыыта бүппүтүн кэннэ таксинан аэропуорка киирдибит. Туох баар бэрэбиэркэни ааһан, сөмөлүөккэ киирээри гыммыппыт, Дьокуускайга көтөр икки рейс тардылларын туһунан таблоҕа сурук тахса турар. Диспетчер хас чаас аайы сөмөлүөт көтөрүн хойутатан истэ.
edersaas.ru
Икки чааһынан S7 авиахампаанньа аатыттан бытыылкалаах уу түҥэттилэр, онтон аэропуорка баар кафеҕа босхо аһаттылар. Түүнү супту утуйбатах дьон киҥнэрэ холлон, миитин тэрийэн, айдаан тарда сыстылар. Рейсэбит көппөтөх биричиинэтэ диэн, Дьокуускайга сөмөлүөт шассита тостон, балаһаттан туораан тахсыбыт, онон аэропуорт сабыллыбыт, хаһан аһыллара биллибэт.
Биһиги ону истэн, төлөбүрдээх кэтэһэр хоско киирэн, аҕыйах чаас утуйан син сынньанныбыт. Сарсыарда буолуута авиахампаанньа бэрэстэбиитэлэ S7 эрэ рейсигэр билиэт атыыласпыт дьону испииһэктээн, икки гостиницаҕа үллэрэн таһааралларын туһунан иһитиннэрдэ. Дьэ, хайдах эрэ хостелга илдьэллэр, барыбытын биир хоско симэллэрэ буолуо диэн сэрэхэдийэ санаатыбыт.
«River-парк» отельга тахсаҕыт, онно босхо аһатыахтара уонна автобуһунан аэропуорка киллэриэхтэрэ», — диэтилэр. Оттон «Якутия» авиахампаанньа рейсигэр билиэт ылбыт дьон биһигини ымсыыра көрөн хааллылар. Кинилэри гостиницаҕа таһаарбатылар.
Арай, Объ өрүс кытылыгар үрдүк мэндиэмэннээх, онтон эбэни туоруур муоста, куорат барыта көстөр кыраһыабай көстүүлээх, аныгылыы бэрт тупсаҕай оҥоһуулаах отельга тиийдибит. Саала ортотугар уп-улахан люстра ыраахтан күлүмүрдүүр, сыаналаах өрөмүөн тута харахха быраҕыллар. Барыбытын иккилии миэстэлээх хоско түһэртээтилэр, рестораҥҥа ас хаска бэлэм буоларын эттилэр. Эбии өҥө быһыытынан, сауна баарын эттилэр, аны аквапаркаҕа илдьэллэр-аҕалаллар.
Рестораҥҥа астара минньигэһэ, дэлэгэйэ сөхтөрдө. Аһыыр кэмҥэр киһини уоскутар муусука доҕуһуоллуур, мониторга айылҕа кэрэ көстүүтэ солбуһа сылдьан көстөр. Сөмөлүөппүт тардыллан, бэртээхэй бонус түстэ диэн үгүстэр үөрдүбүт. Утуйан сынньанан баран куорат көрө, маҕаһыын кэрийэ бардыбыт. Киэһээҥҥи аспытыгар хойутаан кэлбиппитигэр барытын суулаан биэрдилэр. Онон хоспутугар тахсан тото-хана аһаатыбыт.
Сарсыныгар 5 саҕана уһугуннаран, икки этээстээх автобуска олордон, аэропуорка киирдибит. Бу сырыыга сөмөлүөппүт тардыллыбакка этэҥҥэ дьиэбитин буллубут.
S7 авиахампаанньа айанньыттарга тэрийэр сервиһэ үрдүгүн, үчүгэйин, инструкция быһыытынан барыта чуолкайын, дьоҥҥо сыһыаннара да эйэҕэһин, кыргыттара талбыт курдук кырасыабайдарын, ыйытыккар тута хоруйдаан иһэллэрин олус сөхтүбүт, астынныбыт.
Оттон бэйэбит «Якутия» авиахампаанньабыт? Дьокуускайга үгэс курдук сөмөлүөт тардыллан Москваҕа хойутаан тиийэн, уонтан тахса киһи Питерга көтөр сөмөлүөппүтүн куоттаран кэбиспиппит. Внуково аэропуордугар «Якутия» бэрэстэбиитэлин ыйыталаспыппыт, аана хатанан турар, өр-өтөр күүттэрэн баран: «Стыковочнай рейсэҕэ билиэт атыылаһан, сөмөлүөккэ хойутаабыккытыгар биһиги буруйбут суох. Бэйэҕит харчыгытынан иккистээн билиэт атыылаһан салгыы көтүҥ ээ», — диэн тимир-тамыр курдук туттан туран кылгас кэпсэтии манан бүппүтүн көрдөрдө. Бэл, оҕолоох дьону истэ барбата. Дьон манныгы эрэ кэтэспэккэ сирэйгэ бэрдэрбит курдук уку-суку тахсан бардылар. Эгэ, уу биэриэхтэрэ дуо?
Тэҥнээн көрдөххө, икки авиахампаанньа сервистэрэ уонна дьоҥҥо сыһыаннара сирдээх халлаан кэриэтэ. S7 дириэктэрдэрин сүбэтин бэрэссэдээтэлэ, «Сибирь» уонна «Глобус» авиахампаанньа акционера Наталья Филева Арассыыйа 5 саамай баай дьахталларын ахсааныгар киирэр. Кини дьоҥҥо сөбүлэтэн, үлэни сатаан тэрийэн, элбэх киһи билиэт атыылаһан, S7 өҥөтүнэн туһанан ситиһии бэйэтэ сиэттиһэн кэллэҕэ. «Якутия» кинилэргэ тэҥнэһэрэ ыраах эрээри, туох барыта кыраттан саҕаланар.
Марианна ТЫРТЫКОВА, «Саха сирэ» хаһыат, edersaas.ru