Икки күн иһигэр өлгөм бултуйуу

Бөлөххө киир:

Сунтаар улууһугар “Сахабулт” тэрилтэ бэрэстэбиитэлэ Максим Афанасьев оҕолору булка үөрэтэргэ соруммутун, икки күн иһигэр өлгөмнүк бултуйбуттарын туһунан социальнай ситимнэргэ тарҕаммыта. Максим Афанасьевиһы кытары төлөпүөнүнэн кэпсэтэ сырыттыбыт.


— Билигин түүлээххэ, улахан булка сылдьар промысловик булчуттар лаппа сааһырдылар.  Үгүс эр дьон үлэ быыһыгар куска-куобахха эрэ сылдьаллар. Онон, бэйэм уруккуттан бултуур буолан, кэнники кэмҥэ оҕолору, ыччаты уһуйбут киһи диэн саныырым.

Каникул кэмигэр, хаар чараас эрдэҕинэ, түөлбэм оскуолатын салалтатын кытары кэпсэтэн, икки 10-с кылаас уолаттарын 2 күн булка илдьэ сырыттым. Батыһыннара сылдьан кыыл суолун хайдах сонордуурга, ханна уйаланарын, майгытын билэргэ, уо.д.а. кистэлэҥнэргэ үөрэттим. Оҕолор тыаҕа тахсарга таҥастарын-саптарын көрүнэргэ, хомунарга үөрэнэллэрэ да улахан суолталаах. Биир ыттаах этим. Бастакы күн 8 тииҥи бултаабыппыт. Киэһэлик хараҥарыыта биир киис суолун булан баран, куоттаран кэбиспиппит. Сарсыныгар кииспитин суоллаан сиппиппит, 4 тииҥи өлөрбүппүт.

Урут, 80-с сылларга Сунтаар улууһугар киис букатын суох буоллаҕына, билигин үөскээн эрэрэ билиннэ. Оҕолор, биллэн турар, билбэттэрэ-көрбөттөрө элбэх эрээри, үөрэнэргэ баҕалаахтар, интэриэстээхтэр. Тыаҕа сылдьыы сиэринэн, кыттыгас булпутун тэҥҥэ үллэһиннибит, ким ыппытынан, өлөрбүтүнэн диэн буолбатах. Аны Байанайы хомоппот курдук, булдуҥ этин бырахпакка, сиэниллэрин сиэхтээххин, тириитин туһаҕа таһаарыахтааххын. Уолаттар тииҥ тириитин миэхэ туттаран, харчылаһыахтара. Кииспит харчытын эмиэ тэҥҥэ үллэстэбит, — диэн кини кэпсээтэ.

Максим Афанасьевич этэринэн, баҕалаах оҕолор баар буоллахтарына, уолаттары салгыы бултуурга үөрэтиэн сөп. Биллэн турар, тыаҕа уонча буолан батысыһа сылдьыбаккын, ол эрээри, билэр булчуттарбар уолаттары сыһыаран, үөрэттэриэхпин сөп диэн этэр.

Ангелина ВАСИЛЬЕВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0