Икки киһини өлөрүүгэ уорбаланааччы ким эбитий?

Ааптар: 
Бөлөххө киир:

Өйдүүргүт буолуо, бу дьыл ыам ыйын 18 күнүгэр Дьокуускай куорат Кузьмин уулуссатын 43 №-дээх дьиэтин техэтээһигэр икки киһи өлүгүн булбуттарын. 

Вера МАКАРОВА, «Саха сирэ» хаһыат, edersaas.ru


Ити чахчынан силиэстийэ уорганнара РФ Холуобунай кодексатын 105-с ыст. 2-с чааһын «а» пуунунан холуобунай дьыала тэрийбиттэрэ.

Онно тиийбит суһал-силиэстийэлиир бөлөх өлүктэр сыппыттара ырааппытын, номнуо сытыйан эрэллэрин, быһаҕынан анньыллыбыттарын быһаарбыт.

Бэҕэһээ, ыам ыйын 30 күнүгэр, Дьокуускай куорат полициятын холуобунай ирдэбилин оперативниктара бу өлөрүүгэ уорбаланааччыны туттулар. Кэбээйи улууһуттан төрүттээх 35 саастаах киһи доппуруос кэмигэр кэпсээбитинэн, кини атастарын кытта олунньу 23 күнүнээҕи бырааһынньыгы арыгынан бэлиэтии олорон, кыыһырсыбыттар, ол түмүгэр, иккиэннэрин өлөртөөбүт.

СӨ ИДьМ-тын пресс-сулууспата:

— Бу буруй хайдах арылынна? Барыта ыам ыйын 18 күнүгэр ити дьиэни көрөр управляющай компания үлэһиттэрэ бастаан биир өлүгү булбуттарыттан саҕаламмыт. Иккис өлүк быһылаан буолбут сирин чинчийии-үөрэтии кэмигэр көстүбүт.

Оперативниктар өлүөхсүттэр тарбахтарын суолунан кинилэр кимнээхтэрин быһаарбыттар — Уус Алдантан уонна Өлүөхүмэттэн төрүттээх 53 уонна 29 саастаах дьон. Ханна да үлэлээбэт, олорор сирэ суох (норуокка «бомж» дэнэр — В.М.) дьон эбит. Ол аата кинилэри өлөрбүт киһи эмиэ оннук араҥаҕа киирсэр диэн ити хайысханан үлэни саҕалаабыттар.

Маныаха уустуга диэн — итинник олохтоох дьон аймахтарын кытта сибээһи тутуспат, ускул-тэскил сылдьар, ханна баҕарар тиийэн хаалыан, барыан-кэлиэн сөп.

Ол суолу-ииһи көрдөөн, суһал-силиэстийэлиир бөлөх сотрудниктара криминалистическай экспертизаҕа ол техническэй этээскэ булуллубут маллары ыыппыттар. Ол эрэн, уорбаланааччыны оперативниктар сыралаах ырытыы, өй үлэтин түмүгэр, Улахан Марха оройуонугар ыам ыйын 30 күнүгэр, күнүс 15.00 чаас саҕана туттулар.

Билигин силиэстийэ уорганнара уорбаланааччыны Силиэстийэлиир изоляторга хаайар туһунан боппуруоһу көрөллөр.

Вера МАКАРОВА, «Саха сирэ» хаһыат, edersaas.ru

Хаартыска: интернеттэн.  

+1
0
+1
0
+1
0
+1
0
+1
0
+1
0
+1
0