Бу күннэргэ Ил Дархан Егор Борисов өрөспүүбүлүкэтээҕи Перинатальнай уонна Оҕо реабилитацияны ааһар кииннэрин уонна “Россия – мин историям” диэн мультимедийнай пааркатын тутууларын кытары билистэ.
Ил Дархан бастаан Перинатальнай кииҥҥэ сырытта. Бу киин 2014 сыллаахтан тутуллар. Тутууну “Адгезия” хампаанньа иилээн-саҕалаан ыытар. Киин 130 куойкалаах, биир симиэнэҕэ 115 киһини консультациялыыр, диагностыыр анал сирдээх, стационардаах, оҕо төрөөтүн кытта илдьэн көрөр, ону тэҥэ ыйааһына кыра оҕолору көрөр-истэр анал сирдэрдээх буолуохтаах. Маны таһынан, лаборатория, рентгенология, ультразвуковой чинчийиилэри ыытар киин, о.д.а. киирэн биэриэхтэрэ. Быһатын эттэххэ, төрүүр дьахтар уонна кыһыл оҕо доруобуйаларын көрүүгэ-харайыыга бары ирдэбиллэргэ эппиэттиир аныгылыы тииптээх кииннэннибит.
Былаан быһыытынан, сэтинньи 1 күнүгэр диэри тутууга монтажтыыр үлэ барыта бүтүөхтээх. Билигин монтажтыыр үлэни сэргэ оборудованиелары таҥа сылдьаллар.
Салгыы Егор Борисов Оҕо реабилитацияны ааһар киинигэр сырытта. Бу тутуу эмиэ 2014 с. ыытыллар. Икки түһүмэҕинэн үлэҕэ киириэхтээх. Билигин бастакы уочарата тутуллан бүттэ. Утуйар, көрдөрөр куорпуһу таһынан остолобуой, гостиница, массыыналар кыһыҥҥы турар сирдэрэ уонна сылгылар турар туспа дьиэлэрэ баар буолуоҕа. Медиктэр киин иһинэн иппотерапияҕа (сылгыны кытары алтыһыннаран эмтээһин) дьарык ыытар былааннаахтар.
Тутуу хаамыытын туһунан эттэххэ, эбийиэккэ билигин ититии холбоно уонна уот киирэ илик. Тутуу миниистирэ Вера Кузакова бэлиэтээн эппитинэн, сылааһы киллэриигэ тутааччылар уустуктары көрсүбүттэрэ билигин миэстэтигэр быһаарыллыбыт. Онон сотору кэминэн эбийиэк оттуллан, ис өттө ситэри дизайнаныаҕа, миэбэли, оборудованиелары таҥыы саҕаланыаҕа. Былаан быһыытынан, тутуу ахсынньыга диэри бүтүөхтээх.
Түмүккэ Егор Афанасьевич “Россия – мин историям” диэн мультимедийнай пааркаҕа сырытта. Икки мэндиэмэннээх улахан эбийиэк барыта 58 саалалаах. Мантан 24-дэ өрөспүүбүлүкэ историятыгар туһуланна. Ону сэргэ, Судаарыстыбаннаспыт музейа баар буолуоҕа. Санатан эттэххэ, паарка аҕыйах хонугунан аанын тэлэччи аһыахтаах. Эбийиэк дьону-сэргэни көрсөргө бэлэм.
Аграфена КУЗЬМИНА, “Саха сирэ” хаһыат, edersaas.ru