Бүгүн Ил Дархан Айсен Николаев Дьокуускай куоракка тутулла турар саҥа оскуолалары, оҕо саадтарын көрдө.
Киин куоракка судаарыстыба уонна чааһынайдар бииргэ үлэлээһиннэринэн 6-с, 25-с оскуолалар, ону сэргэ, Норуоттар икки ардыларынааҕы Арктика оскуолата, “Айыы кыһата” национальнай оскуола, “Ивушка”, Пионерскай уулуссаҕа уонна 203 оройуоҥҥа турар 3 оҕо саада тутулла сылдьаллар. Бу эбийиэктэр Дьокуускай куорат, СӨ бырабыыталыстыбата уонна “Газэнергомонтаж” ААУо кыттыылаах тутуллаллар. Быйыл үлэҕэ киириэхтээхтэр. Маны таһынан, федеральнай бүддьүөттэн үбүлэнэн 35-с оскуола тутулла турар. Бу оскуола экономика сайдыытын түргэтэтэр инфраструктуралар анал бырагыраамаларыгар киирсибитэ. Быйыл эмиэ үлэҕэ киириэхтээх.
Айсен Николаев эбийиэктэри кэрийэн баран: “Үлэ, сүрүннээн, былаан быһыытынан баран иһэр. Сорох тутуулар болдьохторуттан эрдэлээн иһэллэр. 35-с оскуолаттан ураты, оборудованиелар кэмигэр кэлбиттэр. Онон бу сыл бүтүүтэ 9 социальнай эбийиэк үлэҕэ киириэҕэр эрэл баар. Саҥа тутуулар туолан турар оскуолалары, оҕо саадтары арыый босхолуо этилэр”, — диэн бэлиэтиир. Оттон 35-с оскуолаҕа сыһыаран: “Оскуола кэмигэр үлэҕэ киирбэтэҕинэ, кэнэҕэскитин Дьокуускай куорат эбийиэктэрин Уһук Илин сайдыытын бырагырааматыгар киллэртэрэр уустук буолуоҕа”, — диэн этэн туран, бэдэрээтчик тахсыбыт кыһалҕаны кылгас кэм иһигэр туоратыан, Дьокуускай куорат баһылыга оборудованиелар кэлэр болдьохторун хонтуруолга илдьэ сылдьара наадатын бэлиэтээтэ.
Аграфена КУЗЬМИНА, edersaas.ru